Մարզահամերգային համալիրի հեղինակներն
արձագանքում են նոր սեփականատիրոջ «դատված» լինելուն
Այս տարվա օգոստոսի 13-ին 30 միլիոն դոլարով Կարեն Դեմիրճյանի անվան մարզահամերգային համալիրը օտարվեց, ընդ որում՝ գնորդն էլ ընդամենը մի քանի ամիս առաջ գրանցված «ՆՏԱԱ ԻՆՎԵՍՏՄԵՆՏ ԳՐՈՒՊ» ՍՊԸ-ն էր, որը պետք է չորս տարվա ընթացքում շուրջ 1 միլիարդ դոլարի ներդրում անի: Iravaban.net-ի տվյալներով, Արդարադատության նախարարության իրավաբանական անձանց գրացման ռեգիստրում որպես «ՆՏԱԱ ԻՆՎԵՍՏՄԵՆՏ ԳՐՈՒՊ» ընկերության հիմնադիր նշված է ոմն Արմեն Գեւորգյան, սակայն ընկերության միակ սեփականատերը ԱՄՆ քաղաքացի Վահագն Դինո Ավադիսյանն է: Անշարժ գույքի առուվաճառքի սեպտեմբերի 1-ին կնքված պայմանագրի համաձայն, վաճառողը ՀՀ պաշտպանության նախարար Սեյրան Օհանյանն է, որի լիազորված անձ է հանդես եկել Արայիկ Թորգոմյանը, իսկ մյուս կողմը՝ Վահագն Դինո Ավադիսյանը: Ստացվում է, որ այս տարվա սեպտեմբերի 1-ին հետախուզման մեջ գտնվող այս անձը գտնվել է Երեւանում եւ առուվաճառքի պայմանագիր է կնքել պետության հետ:
Iravaban.am-ը հղում անելով ինտերնետային աղբյուրներին, ապա ԱՄՆ Ալաբամայի անվտանգության կոմիտեի հատուկ գործակալ Մայքլ Վիլկերսոնին, նշել էր, որ համալիրի նոր սեփականատերը ֆինանսական խարդախությունների մեջ մեղադրվելու համար ձերբակալված է եղել, Վահագն Դինո Ավադիսյանը նաեւ հետախուզվել է Ալաբամայի իրավապահների կողմից:
«Առավոտը» ՀՀ կառավարությանն առընթեր պետական գույքի կառավարման վարչությունից հետաքրքրվեց՝ արդյոք Մարզահամերգային համալիրը ֆինանսական խարդախությունների մեջ մեղադրվող մարդուն վաճառելը չի՞ ստվերում գործարքի օրինականությունը, կամ ինչո՞ւ է կառավարության օգոստոսի 13-ի 935-Ա որոշմամբ՝ 60 միլիոն դոլար գնահատված անշարժ գույքն օտարվել կես գնով, եւ ինչպես է հետախուզման մեջ գտնվող անձը վճարել այդ 30 միլիոն դոլարը: Մեզ հուզում էր նաեւ այն հարցը, թե ի՞նչ ճակատագիր է սպասվում համալիրին այս ամենից հետո:
Պետական գույքի կառավարման վարչության լրատվականից հայտնեցին, որ այս հարցերն իրենց դաշտից դուրս են, ինչ վերաբերում է անշարժ գույքի օտարման գնին, այն որոշվել է իրենց վարչության «Պետական գույքի գույքագրման եւ գնահատման գործակալություն» ՊՈԱԿ-ի կողմից:
Կարդացեք նաև
Մշակույթի նախարարության լրատվականից էլ «Առավոտին» հետեւյալը հայտնեցին. «Ի պատասխան Ձեր հարցմանը՝ տեղեկացնում ենք, որ ներկայացված հարցադրումները մշակույթի նախարարության իրավասություններից դուրս են:
Ելնելով այն հանգամանքից, որ Մարզահամերգային համալիրը հանդիսանում է պատմամշակութային հուշարձան, յուրաքանչյուր գործընթացի պարագայում, նախ եւ առաջ հաշվի կառնվի հուշարձանի պաշտպանության շահերը»:
Ճանաչված քանդակագործ, համալիրի բարձրաքանդակի հեղինակ Ֆերդինանտ Առաքելյանը տարակուսած է եւ մտահոգ համալիրի ճակատագրով. «Ճիշտն ասած՝ չգիտեմ` գնորդը ով է, ինչ է, բայց եթե ասում են՝ խարդախության մեջ է խառնված, ապա ինչպե՞ս կարելի է նրան վստահել համալիրը, այստեղ էլ խարդախ բան կանի:
Անկեղծ ասած, ինձ համար հանելուկ է, թե էդ մարդը ինչպես է հայտնվել այստեղ եւ ինչ գումարով է եկել, ինչպես է գնել, կամ գնելու դեպքում ինչ պայմանագիր է կնքնվել՝ որ համալիրում որեւէ բան չի՞ փոփոխվելու, թե՞ նրա հետ կպատահի այն, ինչ եղավ Երիտասարդական պալատի հետ: Պայմանագրի մեջ պետք է ամրագրվի, որ համալիրի մեջ եւ արտաքինից, եւ ներքինից ոչինչ չպետք է խախտվի, թե չէ կարող են վերցնել՝ ասել մեր սեփականությունն է, ուրեմն ապակիներն էլ կարող ենք հանել, ծախել»:
Համալիրի ճարտարապետներից Հրաչյա Պողոսյանը «Առավոտի» հետ զրույցում չցանկացավ մեկնաբանություններ անել, ասում է՝ վստահ չէ, որ Վահագն Դինո Ավադիսյանի մասին տեղեկությունները ճիշտ են. «Չխախտենք մարդու անմեղության կանխավարկածը»: Նա համալիրը օտարելու կառավարության քայլին էլ նորմալ է վերաբերվում, ասում է՝ եթե պետությունը փող չունի համալիրը պահելու, ապա պետք է մասնավոր գնորդ գտնվեր, որը ներդրումներ կկատարեր, իսկ համալիրն ունի ներդրումների կարիք: Մեր հարցին՝ իսկ մտավախություն չունի՞, որ Մարզահամերգային համալիրի հետ կպատահի նույնը, ինչ եղավ Երիտասարդության պալատի հետ: «Այ, դա շատ վատ կլինի, Աստված չանի»,-պատասխանեց ճարտարապետը:
Հիշեցնենք, որ համալիրի մյուս ճարտարապետը՝ Սաշուր Քալաշյանն էլ համալիրի «պատմության» մասին ասել էր, թե կոմեդիայի ժանրից է. «Եթե կառավարությունը որոշում է առանց որեւէ մեկին հարցնելու վաճառել համալիրը, օրենքի պահանջները չկատարելով որոշում է կայացնում՝ ինչ-որ մի մարդու առանց աճուրդի վաճառել այդ օբյեկտը, հետո պարզվում է՝ այդ մարդը ինչ-ինչ բաների մեջ է, ուրեմն կոմեդիայի ժանրից է այս պատմությունը»:
ԳՈՀԱՐ ՀԱԿՈԲՅԱՆ
Հ. Գ. Պատրաստ ենք տպագրել նաեւ խնդրի առնչությամբ ԱՄՆ քաղաքացի Վահագն Դինո Ավադիսյանի տեսակետը:
«Առավոտ» օրաթերթ
04.12..2015
