Ըստ ՀՀ Ընտրական օրենսգրքի 39-րդ հոդվածի 2-րդ մասի՝ ընտրատարածքային և տեղամասային հանձնաժողովի անդամներ, ի թիվս այլոց, չեն կարող լինել համայնքի ավագանու անդամները: Նույն կարգավորումը վերաբերում է նաև Հանրաքվեի տարածքային և տեղամասային հանձնաժողովներին:
Ժառանգություն կուսակցության ներկայացուցչի ահազանգի հիման վրա, Հելսինկյան քաղաքացիական ասամբլեայի Վանաձորի գրասենյակը ուսումնասիրել է բոլոր տեղամասային ընտրական հանձնաժողովների կազմը և հայտնաբերել, որ ընդհանուր առմամբ 203 ավագանու անդամ է ներգրավված տեղամասային ընտրական հանձնաժողովներում, որից Արագածոտնում՝ 18, Արարատում՝ 30, Արմավիրում՝ 7, Գեղարքունիքում՝ 32, Լոռիում՝ 22, Կոտայքում՝ 17, Շիրակում՝ 38, Սյունիքում՝ 17, Վայոց Ձորում՝ 14, Տավուշում՝ 8: Ընդ որում, նրանցից 83-ը ներկայացված է համապատասխան Ընտրատարածքային ընտրական հանձնաժողովի կողմից, 50-ը՝ Հայաստանի հանրապետական կուսակցության, 22–ը՝ Հայ հեղափոխական դաշնակցության, 21-ը՝ Բարգավաճ Հայաստան կուսակցության, 12-ը՝ Օրինաց Երկրի, 10-ը՝ Հայ ազգային կոնգրեսի և 5 – ը՝ Ժառանգություն կուսակցության կողմից:
Մարզային բաշխվածության վերաբերյալ ավելի մանրամասն տեղեկատվություն կարող եք տեսնել կից աղյուսակում:
Հարկ է նշել, որ Ժառանգություն կուսակցության ներկայացուցչի կողմից տրամադրվել է Լոռի, Շիրակ, Տավուշ, Գեղարքունիք մարզերի ուսումնասիրության տվյալները, որոնցում իրենք հայտնաբերել են Ժառանգություն կուսակցության կողմից նշանակված ևս 5 անդամ, որոնց իրենք փոխարինել են անմիջապես հայտնաբերելուց հետո և ՀՔԱ Վանաձորի գրասենյակի ուսումնասիրության ժամանակ արդեն չեն եղել:
Կարդացեք նաև
Ամբողջական հոդվածը կարող եք կարդալ այստեղ
