«Մեր գնահատմամբ՝ մեզնից կախված ամեն ինչ բարեխղճորեն արեցինք այս քարոզարշավի ընթացքում»,- դեկտեմբերի 4-ին լրագրողների հետ հանդիպման ընթացքում, ամփոփելով քարոզարշավը, ասաց ՀՅԴ ԳՄ ներկայացուցիչ, սահմանադրական բարեփոխումների շտաբի պետ Աղվան Վարդանյանը:
Նա նշեց, որ քարոզարշավի ընթացքում Դաշնակցությունը կարողացավ քաղաքացիներին փոխանցել այն, ինչ ուզում էր. «Ցավո՜ք, այս ամբողջ ընթացքում մենք այդպես էլ հնարավորություն չունեցանք մյուս ճամբարի՝ «Ոչ»-ի ճամբարի ներկայացուցիչների հետ բովանդակային խորքային քննարկումներ կատարել: Գիտեք՝ իրենք հրաժարվում են այդ տեսակ քննարկումներից, նույնիսկ անձամբ ինձ հետ եղել է 3-4 դեպք, երբ տարբեր հեռուստաընկերություններ հրավիրել են բանավեճի, հետո հեռաձայնել ասել են՝ ցավոք մյուս կողմը հրաժարվեց ներկայանալուց, մասնակցելուց»:
Աղվան Վարդանյանն ասաց, որ «Ոչ»-ի ճակատի ներկայացուցիչները 2005 թվականի սահմանադրական փոփոխությունների նախագծին եւս ոչ էին ասում, ըստ նրա, հիմա ոչ ասելով սահմանադրական փոփոխությունների նախագծին՝ իրենք այո են ասում նախկին փոփոխություններին, որոնց ոչ էին ասել:
«Կարող եմ վստահորեն ասել, որ երկրում խնդիրները չափազանց շատ են, մարդկանց դժգոհությունը, անվստահությունը, սոցիալական հարցերը ամենուրեք են, կա որոշակի հիասթափություն, կա որոշակի անտարբերություն, բայց դա չի նշանակում, որ պատասխանատու քաղաքական ուժը, եթե ունի իր պատկերացումը, ծրագիրը երկրի զարգացման վերաբերյալ, որակական, արմատական փոփոխությունների վերաբերյալ, չպիտի իրենից կախված ամեն ինչ անի, որ հասարակության մեջ մեծանա մասնակցելու եւ երկրում բան փոխելու ցանկությունը»,- ասաց նա:
Կարդացեք նաև
Ամի ՉԻՉԱԿՅԱՆ
