Ոստիկանները Մոսկվայում ձերբակալել են մի խումբ մարդկանց, որոնց կասկածում են կեղծ 5.000 ռուբլի արժողությամբ թղթադրամներ տպելու մեջ: Այս տեղեկությունը «Interfax»-ին փոխանցել են Ռուսաստանի ներքին գործերի նախարարության մամուլի ծառայությունից:
Ծառայության աշխատակիցն ասել է, որ կեղծ թղթադրամների պատրաստման, պահելու եւ իրացնելու մեջ կասկածվող խմբի անդամներին ձերբակալել են Ռուսաստանի ՆԳՆ-ի աշխատակիցները:
«Ձերբակալվել են խմբի առավել ակտիվ անդամները եւ ղեկավարները: Նրանցից մեկը Հայաստանի քաղաքացի է: Քննարկվում է նրանց նկատմամբ խափանման միջոցի կիրառման հարցը»,- ասել են ՆԳՆ մամուլի ծառայությունում:
Խմբի անդամների բնակավայրում իրավապահները խուզարկություն են կատարել եւ հայտնաբերել են 2.5 միլիոն ռուբլի արժողությամբ բարձր որակի կեղծ 5.000-անոց թղթադրամներ, ինչպես նաեւ համակարգիչներ, հատուկ ներկ եւ ֆոլգա, որոնք անհրաժեշտ են կեղծ թղթադրամներ պատրաստելու համար:
Կարդացեք նաև
Քրեական գործ է հարուցվել Ռուսաստանի քրօրենսգրքի «Կեղծ գումարների եւ արժեքավոր թղթերի պատրաստման, պահման, տեղափոխման եւ իրացման» հոդվածով:
Պատրաստեց Աշոտ ԻՍՐԱԵԼՅԱՆԸ
