Ազգությամբ եզդի Շիրին Ալիյանը այսօր իր ընտանիքի անդամների ու մի քանի ընկերների հետ բողոքի ակցիա է անցկացրել Բաղրամյան 26-ում: Նա իր բողոք դիմումն է հանձնել նախագահական նստավայր՝ պահանջելով բացահայտել հոկտեմբերի 15-ին իրենց տանը տեղի ունեցած ավազակային հարձակումը:
Հիշեցնենք, որ քննչական կոմիտեի նախնական քննության տվյալներով, հոկտեմբերի 15-ին՝ ժամը 06:30-ի սահմաններում, մի խումբ անձինք ապօրինի մուտք են գործել Երեւան քաղաքի Սիլիկյան թաղամասի 4-րդ փողոցի տներից մեկը, կապել տան բնակիչներին, ամուսիններ՝ Շ. Ալիյանին եւ Թ. Սադայանին, եւ որպես զենք օգտագործվող դանակով վերջիններիս կյանքի համար վտանգավոր բռնություն գործադրելով, պահանջել գումար։ Հափշտակելով 20.000 դրամ եւ ոսկյա զարդեր՝ առերեւույթ հանցագործություն կատարած անձինք դիմել են փախուստի:
«Սինջար» եզդիների ազգային միավորման նախագահ Բորիս Մուրազին այսօր նույնպես մասնակցել է տուժած ընտանիքի բողոքի ակցիային: Նրա պատմելով, տուժողները դեպքից մի քանի օր հետո ոստիկանությանն են հանձնել ավազակային հարձակում կատարելու մեջ կասկածվող անձանց լուսանկարներ. «Հանցագործության մեջ կասկածվող անձինք հանրապետական հիվանդանոցի մոտից ոտքով են գնացել դեպի իրենց տուն, ու ճանապարհային տեսախցիկները ֆիքսել են: Տուժողները բողոքում են, որ վերջին օրերին, ոստիկանությունից իրենց հայտնել են, որ գործով նոր տեղեկություններ չկան, գործը փակվում է: Տուժողները պահանջում են, որ ոստիկանությունը գործը չսառեցնի: Նրանք մտավախություն ունեն, որ եթե գործը չբացահայտվի, իրենք երաշխիք չունեն, որ այդ հանցագործները նորից իրենց չեն վնասի»:
Արփինե ՍԻՄՈՆՅԱՆ
