ՀՀԿ մամուլի խոսնակ Էդուարդ Շարմազանովը դեկտեմբերի 3-ին ՀՀԿ գործադիր մարմնի նիստից հետո, անդրադառնալով «Նոր Հայաստան» հանրային փրկության ճակատի հանրահավաքին` ասել էր. «Նրանք ասում են, թե հաղթել են, քանի որ հանրահավաք են արել, իսկ «Հանրապետականները» հանրահավաք չարեցին: Տեղեկացնեմ. իրենց կազմակերպած այսօրվա հանրահավաքին ավելի քիչ մարդ կար, քան միջին վիճակագրական հայկական հարսանիքում»:
Դեկտեմբերի 4-ին «Նոր Հայաստան» հանրային փրկության ճակատի՝ Ազատության հրապարակում կազմակերպած տեղեկատվական երկխոսության ընթացքում լրագրողները խնդրեցին Ժիրայր Սեֆիլյանին անդրադառնալ այս հայտարարությանը, սակայն նա պատասխանեց, որ չի պատրաստվում «անհեթեթ հայտարարություններին» մեկնաբանություններ տալ:
Դեկտեմբերի 3-ին «Նոր Հայաստանը» հայտարարել էր, որ վրաններ է տեղադրելու եւ մշակույթի նախարարությանը ժամանակ էր տվել, հարցին, թե պատրաստվո՞ւմ են վրաններ տեղադրել, նա պատասխանեց. «Քանի որ մենք հնարավորություն ենք տվել մշակույթի նախարարությանը հրաժարվել իրենց՝ խոչընդոտելու մտքից, բայց կարծես իրենք համառորեն շարունակում են մինչ այս պահը, այդ փորձը պիտի արվի»:
Ճշտող հարցին, թե այդ փորձը պետք է արվի՞ մինչ հանրահավաքը, նա պատասխանեց՝ տարբեր ժամերին:
Կարդացեք նաև
Ժիրայր Սեֆիլյանը հայտարարեց, որ հեղափոխության գործընթացն արդեն սկսվել է, եւ իրենք հանրաքվեի օրը՝ դեկտեմբերի 6-ին ժամը 20-ից սկսած բոլորին սպասում են Ազատության հրապարակում. «Եկել է վճռական պահը»:
Ամի ՉԻՉԱԿՅԱՆ
