Այսօր տեղի ունեցած Հայաստանի Հանրապետական Կուսակցության գործադիր կոմիտեի նիստում քննարկվել են Սահմանադրական բարեփոխումների քարոզարշավի ընթացքը, աշխարհաքաղաքական զարգացումների, արտաքին քաղաքականության հետ առնչվող հարցեր:
Նիստից հետո ՀՀԿ մամուլի խոսնակ, ԱԺ փոխնախագահ Էդուարդ Շարմազանովը հանդիպեց լրագրողների հետ:
Հարցին՝ տեղյա՞կ է արդյոք, որ Վարդան Օսկանյանը ֆեյսբուքում գրառում է կատարել, որում հարց է տվել, թե ի՞նչ է անելու ՀՀԿ-ն, եթե դիցուք, «Ժառանգությունը» հաղթի 2017 թվականի խորհրդարանական ընտրություններում, կամ էլ՝ եթե Սահմանադրական բարեփոխումների այս հանրաքվեում «Ոչ»-ը հաղթի, պարոն Շարմազանովը պատասխանեց. «Տեղյակ եմ պատգամավոր Օսկանյանի գրառմանը, բայց շատ զարմացած եմ, որովհետեւ ես նրա մասին ավելի բարձր կարծիքի էի: Իմ կարծիքով պատգամավոր Օսկանյանը հերթական անգամ կարդացել եւ չի հասկացել նախագահի հարցազրույցում արված դրույթների իրական էությունը եւ բովանդակությունը: Որովհետեւ պարոն նախագահը հստակ է նշել իր հարցազրույցում, որ պրոբլեմը ոչ թե նա է, թե «Ժառանգությունը» կընտրվի կամ չի ընտրվի, այլ այն, որ երկու ուղղակի մանդատ ստացած ուժերը, այսինքն` պառլամենտական մեծամասնություն ստացած կուսակցությունը եւ նախագահը կարող են ունենալ լուրջ հակասություն եւ այդ հակասությունը կարող է հանգեցնել կառավարման ճգնաժամի, որը կապված է նաեւ արտաքին քաղաքականության եւ անվտանգության հարցերին հետ եւ երրորդը՝ պարոն Օսկանյանին տեղեկացնեմ. Ով կհաղթի, նա էլ ամբողջությամբ պատասխանատվություն կկրի»:
Հարցին, թե այսօր Լեւոն Զուրաբյանը հայտարարել է, թե իրենք արդեն հաղթել են, Էդուարդ Շարմազանովը պատասխանեց. «Իրենք ովքե՞ր են: Այո, այսօր նիստից առաջ այդ էլ էինք նայում ուղիղ եթերով: Նրանք ասում են, թե հաղթել են, քանի որ հանրահավաք են արել, իսկ «Հանրապետականները» հանրահավաք չարեցին: Տեղեկացնեմ. իրենց կազմակերպած այսօրվա հանրահավաքին ավելի քիչ մարդ կար, քան միջին վիճակագրական հայկական հարսանիքում: Եթե դա հանրահավաք է, պետք է ասեմ, որ «Ժպիտի» Գարիկն ավելի շատ հաջողություն ունի: Որովհետեւ «Ժպիտի» Գարիկի կենացները լսում են ավելի շատ հարսանքավորներ, քան ձեր նշած հռետորի հանրահավաքի մասնակիցները»
Կարդացեք նաև
Աշոտ ՀԱԿՈԲՅԱՆ
