Ինչպես տեղեկացրել ենք, այսօր առավոտյան դիմակավորված երկու անձիք ներխուժել են Գյումրու Ղուկասյան 37 առանձնատուն, որտեղ բնակվում են տարեց ամուսիններ՝ 1939 թվականին ծնված Կարապետ Ոսկանի Բեզիկյանն ու նրա կինը՝ Արփիկ Բեզիկյանը ու դանակի սպառնալիքով, կպչուն ժապավենով տանտիրոջ ոտքերը, ձեռքերը ու բերանը կապելով՝ հափշտակել են գումար ու ոսկեղեն:
Չբավարարվելով այս ամենով՝ վերջիններս կացնով խփել են տանտիրոջը: Շիրակի մարզի դատախազ Րաֆֆի Ասլանյանը մեզ փոխանցեց, որ նշանակվել է դատաբժշկական փորձաքննություն պատճառված մարմնական վնասվածքների ծանրության աստիճանը պարզելու նպատակով: Նա նաեւ ասաց, որ ամուսիններին պատճառած վնասի նախնական չափը պարզելուց հետո հարուցվել է քրեական գործ ՀՀ Քրեական օրենսգրքի 175-րդ հոդվածի 3-րդ մասի 1-ին կետով, այսինքն` ավազակություն, որը կատարվել է առանձնապես խոշոր չափերով գույք հափշտակելու նպատակով:
Կարդացեք նաև
Նշենք, որ հանցագործները դեռ հայտնաբերված չեն, իսկ Ղուկասյան 37 փողոցը, որտեղ բնակվում են տարեց ամուսինները Գյումրու ամենամարդաշատ տեղանքներից մեկն է, նրանց առանձնատունը գտնվում է «ՎՏԲ» բանկի անմիջապես հետնամասում, այստեղ կան բազմաթիվ խանութներ, ատամնաբուժարաններ, դպրոցներ, մի քանի մետր հեռավորության վրա էլ գտնվում է Գյումրու ժուռնալիստների «Ասպարեզ» ակումբը:
Նունե ԱՐԵՎՇԱՏՅԱՆ
Առանձնատան լուսանկարը՝ ըստ «Ցայգ» հեռուստաընկերության
