«Հանրությունը ինքը պետք է գիտակցի, որ իշխանության կրողն ինքն է»,- դեկտեմբերի 3-ին «Հայացք» մամուլի ակումբում լրագրողների հետ հանդիպման ընթացքում ասաց ԱԺ պատգամավոր Զարուհի Փոստանջյանը:
Նա նշեց, որ յուրաքանչյուր քաղաքական գործիչ, քաղաքական ուժ, հանրային գործիչ, քաղաքացիական շարժում իր համար այդ իրավունքի իրացումը, այսինքն՝ իշխանության կրելը, չի կարող իրագործել, հետեւաբար՝ հանրությունը դրանից անմասն չի կարող մնալ. «Իսկ բոլոր քաղաքական գործիչները, որոնք տեսնում են պայքարի տարածք, պարտադիր պետք է մասնակցեն: Սա իմ դիրքորոշումն է, ես երբեք չեմ կարծում, որ եթե կա տեղ ընդվզելու, ապա դու պետք է սպասես՝ իմանալով, որ ապարդյուն է նույնիսկ, դու պետք է ընդվզես: Դա իմ ե՛ւ կյանքի սկզբունքն է, ե՛ւ ապրելու հնարավորությունը, հատկապես՝ այս պարագայում: Եթե կա մի տեղ, որտեղ պետք է բողոքես, եթե կա մի տարածք, որտեղ դու կարող ես ընդվզել, ապա դու պարտավոր ես անել: Իսկ տվյալ պարագայում՝ երբ մենք գտնվում ենք, ըստ էության բանտում, բանտից չփախնելը, համակերպվելն անթույլատրելի է»:
Զարուհի Փոստանջյանը, անդրադառնալով խախտումներին, ասաց, որ Հանրապետական կուսակցության անդամները, որոնք նաեւ հանձնաժողովների նախագահներ են, տարբեր ձեւերով փորձում են հանձնաժողովի անդամների նկատմամբ ճնշում գործադրել, ահաբեկել. «Բոլոր գործիքները, ինչպես միշտ, դրված են շրջանառության մեջ: Դա չպետք է մեզ կաշկանդի, ընդհակառակը՝ նրանք՝ բոլորը, պետք է արժանանան ծաղրի: Այսինքն՝ այս անձինք, որոնք փորձում են նորից ապօրինություններ կիրառել, նրանք պետք է արժանանան ծաղրի եւ ծաղրի առարկա դառնան»:
Ամի ՉԻՉԱԿՅԱՆ
