Այսօր Լվովում մեկնարկում է շախմատի Ուկրաինայի տղամարդկանց 85-րդ առաջնությունը, իսկ վաղվանից 75-րդ անգամ պայքարի մեջ կմտնեն գեղեցիկ սեռի ներկայացուցիչները:
Կանանց առաջնության մասնակիցների մեջ լինելու է նաեւ Եվգենյա Դոլուխանովան, որը մի քանի տարի առաջ հանդես էր գալիս Հայաստանի շախմատի ֆեդերացիայի դրոշի ներքո: Նա Ուկրաինայի առաջնությանը որոշ ընդմիջումներով մասնակցում է 2002 թվականից:
Երեկ «Առավոտը» զրուցեց Եվգենյայի հետ: Շախմատիստուհին գերադասեց իր պատրաստվածության աստիճանի մասին զրուցել ավելի ուշ՝ Ուկրաինայի այս առաջնության ավարտից հետո, քանի որ բոլոր հարցերի պատասխանը կտա ամփոփիչ մրցաշարային աղյուսակը: Բայց մեր խնդրանքով Դոլուխանովան իր գնահատականները տվեց վերջերս Ռեյկյավիկում անցկացված Եվրոպայի թիմային առաջնությունում մեր տղամարդկանց եւ կանանց հավաքականների մասնակցությանը: «Տղամարդիկ շատ լավ հանդես եկան, իսկ աղջիկները կարող էին ավելին անել: Տղաներից Հրանտ Մելքումյանը հիանալի արդյունք ցույց տվեց: Աղջիկներից Լիլիթ Մկրտչյանը, ինչպես ասում են, լավ պահեց երկրորդ խաղատախտակը, իսկ Մարիա Կուրսովան, կարծում եմ, հաճելիորեն զարմացրեց թե շախմատի երկրպագուներին, թե մասնագետներին», – ասաց Եվգենյա Դոլուխանովան:
ԱՇՈՏ ՀԱԿՈԲՅԱՆ
Կարդացեք նաև
«Առավոտ» օրաթերթ
03.12..2015
