Aravot.am-ը Ճանաչված քանդակագործ Ֆերդինանտ Առաքելյանից հետաքրքրվեց՝ որպես մտավորական ինչպես է վերաբերվում «Այո»-ի եւ «Ոչ»-ի քարոզչությանը, արդյոք կարողանում են համոզել: «Մտավորականն ինքը արդեն ընդդիմություն է, բայց ոչ այն ընդդիմությունը, որը պատերազմում է աթոռի համար: Մտավորականն այն ընդդիմությունն է, որն ուզում է արդար, քաղաքացիական հասարակություն»,-ասաց պարոն Առաքելյանը:
Մեր հարցին՝ հիմա ըստ իրեն «Այո՞»-ն է բերելու նման հասարակության, թե՞ «Ոչ»-ը: «Ես որպես մարդ, մտավորական, մտածում եմ, որ երկու պարագայում էլ հներն են վերադառնալու, եթե ասում ենք «Այո», վերարտադրվում է Սերժ Սարգսյանը, ասում ենք՝ «Ոչ», վերարտադրվում են Լեւոն Տեր-Պետրոսյանն ու Ռոբերտ Քոչարյանը: Չկա ուրիշ երրորդ ուժ, մշակութային կարգին մարդ, որ կարողանա շարունակել, դա է ինձ անհանգստացնում»,-ասում է քանդակագործը:
Նա տեղեկացրեց, որ այսօրվա դրությամբ, դեռ չի կողմորոշվել թե ինչ է քվեարկելու, ասում է. «Ամեն դեպքում՝ «Ոչ»-ի հաղթանակի դեպքում մտավախություն ունեմ, որ կթեքվենք դեպի Եվրոպա եւ Ամերիկա, իսկ դա սարսափելի է հատկապես այս շրջանում, որովհետեւ մեր երկրի շահից բխում է Ռուսաստանի հետ լինել»:
Գոհար ՀԱԿՈԲՅԱՆ
