Նոյեմբերի 27-ին հայտնի էր դարձել, որ ԱԺ ՀԱԿ խմբակցության ղեկավար Զուրաբյանը դիմել է ՀՀ գլխավոր դատախազություն՝ հայտնելով, թե ՀԱԿ հանձնաժողովի անդամ Վարդան Հարությունյանին կաշառելու փորձ է արվել։ Պատգամավորի հաղորդման հիման վրա դեկտեմբերի 1-ին հատուկ քննչական ծառայությունը ձերբակալեց Կենտրոն վարչական շրջանի աշխատակից Զավեն Միրիջանյանին, որը 1-03 շտապ բուժօգնության ծառայության պետի օպերգծով տեղակալ Վահե Միրիջանյանի եղբայրն է։
Դեռեւս 2013 թվականի նախագահական ընտրություններին Ջավեն Միրիջանյանը եղել է Երեւանի թիվ 09/02 ընտրատեղամասի հանձնաժողովի նախագահը։ Նրա հովանավորը ՀՀ տրանսպորտի եւ կապի նախարար Գագիկ Բեգլարյանն է։ Պարզվում , որ Ջավեն Միրիջանյանի ղեկավարությամբ գործող ընտրատեղամասում մինչ այս տեղի ունեցած ընտրություններն այդքան էլ հարթ չեն անցել։ ՀՀ նախագահի ընտրությունների ժամանակ Նար-Դոսի փողոցում՝ Նալբանդյանի անվան դպրոցում տեղակայված թիվ 09/02 տեղամասում մի ընտրող փորձել էր ուրիշի անձնագրով քվեարկել, սակայն երբ վստահված անձինք միջամտել էին, նա վազելով դուրս Էր փախել։
Հանձնաժողովի նախագահ Զավեն Միրիջանյանն էլ լրատվամիջոցներին հաստատել էր միջադեպը՝ փորձելով վստահեցնել, թե. «Ուրիշի անձնագրով չի եկել»։
Նկատենք, որ մինչ հանձնաժողովի անդամը փախուստի դիմաց քաղաքացուն ցանկացել էր փրկել անցանկալի հետեւանքներից, վերոնշյալ ընտրատեղամասում գտնվող վստահված անձինք ուշագրավ մանրամասներ էին պատմել տեղի ունեցած խախտումից։ Երբ վստահված անձինք քվեարկած քաղաքացիներից երկուսին խնդրել էին ցույց տալ իրենց անձնագրերը, պարզվել էր, որ դրանցում քվեարկությունը հաստատող կնիք չկա։ ՀՀԿ-ական հանձնաժողովի նախագահ Զավեն Միրիջանյանը ենթադրել էր, որ թանաքը, հավանաբար, ցնդել է։
Ավելի ուշ Միրիջանյանը վերցրել էր քաղաքացու անձնագիրը՝ իբր ստուգելու համար, սակայն ակնհայտորեն հասկացրել էր երիտասարդին, որ խլի իր ձեռքից անձնագիրն ու դիմի փախուստի, ինչն էլ երիտասարդը հաջողությամբ արել էր ու այդպես էլ մնացել անպատիժ։
Եվ եթե դեռեւս 2013 թվականին իրավապահևերը նշված ընտրատեղամասում արձանագրված խախտումների մասով քննություն սկսեին եւ հասկանային, թե ով է ուղղորդել քաղաքացիներին կրկնակի քվեարկություն իրականացնել, եւ ինչու է Զավեն Միրիջանյանը քաղաքացուն ասել՝ փախի, ըստ էության, 2 տարի անց չէինք ունենա հանցափորձի թարմ դեպքը՝ կաշառքի տեսքով։
Քնար ՄԱՆՈՒԿՅԱՆ
Հոդվածն ամբողջությամբ կարող եք կարդալ «Ժողովուրդ» թերթի այսօրվա համարում
