«Մենք առաջարկում ենք առաջիկա իշխանափոխությունից հետո ոստիկանության 10.000 զինծառայողներին տեղափոխել պայմանագրային զինծառայության, որպեսզի նրանք պահեն մեր սահմանը մեր 18-20 տարեկան երեխաների հետ եւ ոչ թե գան մեր քաղաքացիներին ճնշեն»,- «Նոր Հայաստանի» նախաձեռնած հանրահավաքի ընթացքում հայտարարեց «Ժողովրդավարական հայրենիք» կուսակցության նախագահ Պետրոս Մակեյանը:
Նա ասաց, որ վերջերս իշխանությունները սկսել են կրկին հայտարարել, որ իրենք պատերազմի մեջ են, Ադրբեջանի իշխանությունները հոխորտում են, մեր կողքը 3-րդ համաշխարհային պատերազմ է սկսվել: Նրանք նաեւ հարցնում են, թե «Նոր Հայաստանը» չի՞ վախենում այդ ամենից. «Բայց կներեք, ո՞վ սկսեց, ի՞նչ նպատակով սկսեց: Դա մենք չենք սկսել, դուք եք սկսել: Ի՞նչի համար այս հանրաքվեն ներգրավվեցիք: Ժողովրդին արդեն ծնկի եք բերել, ձեր հաշվարկով, որ Գագիկ Ծառուկյանին քաղաքականությունից հանեցիք, ուրեմն քաղաքական դաշտն այլեւս ի վիճակի չէ ձեր դեմ պայքարել»:
Անդրադառնալով ԵԽԽՎ-ի օրակարգ վերջերս մտած երկու հակահայկական բանաձեւերին՝ Պետրոս Մակեյանն նշեց, թե իշխանություններն ասում են, որ մեղավորը նավթադոլարներն են. «Ի՞նչ նավթադոլար: Ամբողջ մեր ընդերքը հոշոտել եք, ժողովրդին հասցրել եք աղքատության եզրին: Գնացեք դուք էլ կաշառեք՝ նման բանաձեւեր չընդունեն: Թե՞ ձեր բարոյական համակարգը դրան չի բռնում: Դուք չէի՞ք, որ մարտի 1-ի գործով կաշառքներ էիք տալիս»:
Աշոտ ԻՍՐԱԵԼՅԱՆ
