«Բարոյականության, մարդկային հոգեբանության խեղում է: Ես իր մասին ավելի բարձր կարծիքի էի»,- Aravot.am-ի հետ զրույցում ասաց ՀՀԿ խմբակցության պատգամավոր Մկրտիչ Մինասյանն`անդրադառնալով «Նոր Հայաստան» միավորման երթի ժամանակ Րաֆֆի Հովհաննիսյանի նախաձեռնությանը`ծաղիկներ դնել ՀՀԿ գրասենյակի առջեւ: Իր հետագա պարզաբանումներում, «Ժառանգություն» կուսակցության նախագահ Րաֆֆի Հովհաննիսյանն ասաց, որ դրանք հրաժեշտի ծաղիկներ էին: Ինքը պատրաստվում էր նաեւ կառավարության շենքի մոտ «հրաժեշտի ծաղիկներ» դնել, բայց դրանք, ի վերջո, բաժին հասան Երեւանի փոխոստիկանապետ Վալերի Օսիպյանին:
«Մենք իրեն հրաժեշտի առիթ եւ հնարավորություն կունենանք»,- ասաց Մկրտիչ Մինասյանը`հավելելով.«Հրաժեշտի առարկան ինքն է իր անհասկանալի թիմով, իր ղեկավարած կուսակցությամբ, որտեղ անընդհատ խառնաշփոթ է, ընդհանրություն չկա, միասնություն, գաղափարախոսություն չկա, պարզվեց նաեւ բարոյականություն չկա»:
Կարդացեք նաև
ԱԺ պետաիրավական հարցերի մշտական հանձնաժողովի նախագահ Հովհաննես Սահակյանն էլ տպավորություն է ստացել, որ Րաֆֆին ծաղիկները ձեռքին, մոլորված Զարուհուն է փնտրում եւ չի գտնում. «Երեւի եկել էր ՀՀԿ գրասենյակում հարցներ`որտե՞ղ է Զարուհին: Բայց մենք իմանայինք էլ՝ չէինք ասի Զարուհու տեղը»:
Օրերս «Նոր Հայաստան» միավորման համակարգող Ժիրայր Սեֆիլյանը հայտարարեց, որ հանրաքվեի գործընթացը կասեցնելու հարցը, որն իրենց պահանջներից մեկն է, թե ներսի, թե դրսի որոշակի շրջանակներում քննարկվում է: Հովհաննես Սահակյանը տեղյակ չէ թե ո՞ր շրջանակներում եւ ի՞նչ է քննարկվում, բայց մի բան հստակ գիտի`իշխանական շրջանակում նման քննարկում չկա:
Անդրադառնալով արդեն «Նոր Հայաստանի» բուն գործողություններին, պատգամավորն ասաց. «Երեկ մենք տեսանք, որ իրենք շեղվեցին իրենց իսկ նախապես նշած երթուղուց: Ոստիկանություն որոշակի հանդուրժողականություն դրսեւորեց: Հուսով եմ, հորդորում եմ, որ նախապես նշված երթուղուց շեղվելը սովորույթ չի դառնա եւ այսուհետ ամեն ինչ կընթանա իրազեկմանը համապատասխան: Այլապես, կստացվի, որ իրենք ոչ օրինական երթ կամ հավաք են անում: Մեզ համար ընդունելի է ցանկացած խոսքի լսելի դարձնելը, բայց ժողովրդավարության կոչերով հանրահավաքի մասնակիցներն առաջինն իրենք պետք է հետեւեն հանրահավաքի ոգուն եւ տառին»:
Նելլի ԳՐԻԳՈՐՅԱՆ
