Բազուկի ու կիտրոնի հյութերի խառնուրդը կիրառվում է գրիպի, սուր շնչառական հիվանդությունների, բարորակ եւ չարորակ ուռուցքների, լեղաքարային հիվանդության ժամանակ
Բազուկը ե՛ւ օգտակար, ե՛ւ համեղ բանջարեղեն է, որը մի շարք խնդիրներից խուսափելու համար առաջարկվում է անպայման ներառել սննդակարգում: Ժողովրդական բժշկության մեջ առավել հայտնի է բազուկի հյութը: Այն իր բաղադրության մեջ պարունակում է 23-25% շաքար, պիգմենտներ, պրոտեիններ, մեծ քանակությամբ կալցիում, քիմիական տարրեր, օրգանական միացություններ։
Վիտալի Ասլանյանի հրատարակած «Հյութաբուժության» մեջ գրվում է, որ բազուկի հյութը մաքուր վիճակում 1 բաժակ կամ ավելի խմելը շատ դժվար է եւ մաքրման բուռն ռեակցիա առաջացնելով` արտահայտվում է գլխապտույտով, սրտխառնոցով։ Փորձը ցույց է տվել, որ լավագույն ձեւը խառնուրդների տեսքով օգտագործելն է։ Կարելի է ժամանակի ընթացքում գազարի հյութը պակասեցնելով հասցնել 0-ի, իսկ բազուկն աստիճանաբար ավելացնել, որ օրգանիզմն ընտելանա։ Սովորաբար օրվա ընթացքում օգտագործվում է 1-1.5 բաժակ հյութ, օրը 2 անգամ կամ 100 գրամ՝ օրը 3 անգամ։
Գրքում օրինակ է բերվում, թե ինչպես մի 40-ամյա տղամարդ 20 տարի շարունակ տառապել է լեղապարկի սուր ցավերից, որոնց պատճառը քարերն էին, որը հյութերով բուժվել է հետեւյալ կերպ, հիվանդը սկսել է խմել 10-12 բաժակ շատ տաք ջուր, յուրաքանչյուր բաժակին 1 կիտրոնի հյութ, իսկ օրվա ընթացքում խմում էր 1-1.5 լիտր` բաժակին ավելացնելով բազուկի, գազարի, վարունգի հյութերի խառնուրդ։ Հաջորդ օրը նրա մոտ սկսվեցին ուժեղ ցավեր, որոնք տեւում էին 10-15 րոպե։ Ուրիշ սնունդ հիվանդը չէր ընդունում։ Շաբաթվա վերջում վրա հասավ ճգնաժամը, որի ընթացքում նա ցավերից գալարվում էր հատակին, բայց հանկարծ ցավերը հանդարտվեցին։ Քարերը արդեն դուրս էին եկել:
Գազարի, բազուկի, վարունգի հյութերի խառնուրդը մաքրում է ոչ միայն լեղապարկն իր ծորանով, այլեւ լյարդը, ենթաստամոքսային գեղձը, սեռական գեղձերը։ Բազուկի հյութը իջեցնում է արյան բարձր ճնշումը, եթե խառնում եք մեղրի հետ (խառնել հավասար քանակներով, խմել 6 անգամ՝ սուրճի բաժակով)։ Արտաքին խոցերի ու վերքերի հետ հյութն օգտագործում են նաեւ արտաքին օգտագործման ձեւով։ Կիսով չափ գազարի հյութի հետ խառնելով եւ խմելով օրական 3-4 բաժակ, օգնում է սակավարյունության ժամանակ։
Բազուկի հյութը օգտակար է նաեւ երակների լայնացման ու կարծրացման, արյան թանձրացման դեպքում, խթանում է լիմֆայի գործունեությունը, արյան կարմիր գնդիկների առաջացումը, լավացնում է հիշողությունը, մաքրում արյունատար անոթները, ամրացնում նյարդային համակարգը։ Կիրառում են պնեւմոնիայի, պլեւրիտի, բրոնխիտի, ճարպակալման, սրտի իշեմիկ հիվանդության, աթերոսկլերոզի, վահանաձեւ գեղձի հիվանդությունների, դաշտանային ցիկլի խախտումների, աղեստամոքսային խոցերի դեպքում։ Համաձայն հունգարական աղբյուրների` բազուկի եւ գազարի հյութերի 1:4 հարաբերությամբ խառնուրդը (օրը 100 գ) լավացնում է քաղցկեղով հիվանդների վիճակը` կանգնեցնելով ուռուցքի աճը։ Քաղցկեղի դեպքում կարելի է հյութի քանակը հասցնել մինչեւ 600 մլ-ի (սկսելով 1 ճաշի գդալից, աստիճանաբար ավելացնելով, 20 օրվա ընթացքում)։ Ցանկալի է հյութը ստանալուց հետո որպես պրոֆիլակտիկ միջոց շարունակել մշտապես խմել բազուկի այդ շատ թանկարժեք հյութը` օրը 1 բաժակ։
Գրքում նշվում է մի քանի դեղատոմսեր քաղցկեղի դեպքում`
1. Բազուկի հյութ` 50 միլիգրամ, անյուղ մածուն` 100 գրամ, կիտրոնի հյութ` 50 միլիգրամ։ Խմել քնելուց առաջ, 1 թեյի բաժակ, 2 ամիս շարունակ։
2. Բազուկի հյութ` 50 միլիգրամ, նույնքան գազարի հյութ, յուղազրկված կաթ` 100 միլիգրամ, մեկ թեյի գդալ մեղր։ Խմել քնելուց առաջ, տաք վիճակում, 15 օր շարունակ։
Որքան էլ բազուկի հյութը աչքի է ընկնում օգտակարության բարձր ցուցանիշով, բայց այս բանջարեղենը եւս հակացուցումներ ունի: Նշվում է, որ շաքարախտի ու միզաքարային հիվանդությունների ժամանակ բազուկի հյութը պետք է օգտագործել շատ զգույշ (եթե մեզի անալիզը ցույց է տալիս, որ առկա են օքսալատներ ու ֆոսֆատներ)։
Չպետք է մոռանալ նաեւ, որ բազուկի հյութն ստանալուց հետո պահպանման առավելագույն ժամկետը 2 ժամն է, այն էլ՝ սառնարանում։ Այլապես բազուկի մեջ նիտրատների մեծ քանակություն (պարարտանյութերի հաշվին) լինելու դեպքում դրանք կարող են վերածվել նիտրիտների, որոնք էլ կառաջացնեն ծանր թունավորում ու նույնիսկ կհասցնեն մահվան։
Բազուկի ու կիտրոնի հյութերի խառնուրդը դրսեւորում է լեղամուղ, արյունաստեղծ, իմունիտետը բարձրացնող հատկություններ, որի համար էլ այն կիրառվում է գրիպի, սուր շնչառական հիվանդությունների, բարորակ եւ չարորակ ուռուցքների, լեղաքարային հիվանդության ժամանակ: Այս դեպքում ընդունում են օրը 3 անգամ, 1 թեյի գդալ` հարմարվելու համար, աստիճանաբար չափը դարձնելով 0.5-1 թեյի բաժակ, օրը 3 անգամ:
Որպես քաղցկեղային հիվանդությունը բացառող եւ օրգանիզմի դիմադրողականությունը խիստ բարձրացնող միջոց՝ առաջարկվում է հետեւյալ դեղատոմսը. 3 կիլոգրամ բազուկը, 3 կիլոգրամ գազարը մաքրել, լվանալ, ավելացնել 2 կիլոգրամ նուռ` կեղեւով, 2 կիլոգրամ կիտրոն` միայն կորիզները հեռացված, այդ ամենը անցկացնել հյութաքամիչով, ավելացնել 2 կիլոգրամ մեղր եւ պահել միայն սառնարանում: Ընդունել առավոտյան եւ երեկոյան 50 գրամ, 1 ամիս շարունակ: Ընդմիջել 2 շաբաթ եւ վերսկսել:
Նաեւ չպետք է մոռանալ, որ ցանկացած բուժում սկսելուց առաջ պետք է խորհրդակցել բժշկի հետ:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ» օրաթերթ
01.12..2015
