Անձնական օգտագործման մարդատար մեքենաների պարտադիր տեխնիկական զննման պահանջը վերացնելու մասին ԱԺ պատգամավոր Հովհաննես Մարգարյանի առաջարկը կառավարությունը մերժում է:
Կառավարությունը դեկտեմբերի 3-ին Հովհաննես Մարգարյանի՝ «Ճանապարհային երթեւեկության անվտանգության ապահովման մասին» օրենքում լրացում կատարելու մասին» օրենքի նախագծին բացասական եզրակացություն կտա:
Տեխզննման վերացման առաջարկով օրենքի նախագծի անհրաժեշտությունը պատգամավորը հիմնավորվել է, այն հանգամանքով, որ գործող իրավակարգավորման պայմաններում անձնական օգտագործման տրանսպորտային միջոցների շուրջ 90 տոկոսը տեխնիկական զննության կտրոններ ստանում են առանց տրանսպորտային միջոցների իրական զննության, այսինքն՝ վարորդները վճարում են ոչ թե ծառայության, այլ թղթի համար: Ըստ հիմնավորման, այդ նկատառումով, ինչպես նաեւ հաշվի առնելով հարեւան Վրաստանի փորձը, նախագծով առաջարկվում է անձնական օգտագործման մարդատար տրանսպորտային միջոցների պարտադիր տեխնիկական զննության պահանջը հանել:
Իսկ կառավարությունն էլ իր մերժումը հիմնավորում է այն հանգամանքով, որ տրանսպորտային միջոցի տեխնիկական վիճակը, կահավորումը պետք է համապատասխանեն օրենքի պահանջներն:
Կարդացեք նաև
Ըստ կառավարության, «Ճանապարհային երթեւեկության անվտանգության ապահովման մասին» օրենքի 14-րդ հոդվածից հետեւում է, որ տրանսպորտային միջոցների տեխնիկապես սարքին վիճակում շահագործելը համարվում է ճանապարհային երթեւեկության անվտանգության ապահովման կարեւոր երաշխիքներից մեկը, հետեւաբար՝ անձնական օգտագործման տրանսպորտային միջոցների տեխնիկական զննության պահանջը հանելը կարող է հանգեցնել ճանապարհային երթեւեկության վթարների թվաքանակի աճի: Ուստի, անհրաժեշտ է ոչ թե հանել պարտադիր տեխնիկական զննության պահանջը, այլ մշակել մեխանիզմներ, որոնց միջոցով հնարավոր կլինի ապահովել տրանսպորտային միջոցների տեխնիկական զննության իրականացումը՝ սահմանելով դրա նկատմամբ իրական հսկողություն:
Նելլի ԲԱԲԱՅԱՆ
