Aravot.am-ը Հայոց ցեղասպանության թանգարան-ինստիտուտի փոխտնօրեն, արեւելագետ Սուրեն Մանուկյանից հետաքրքրվեց՝ Հայոց ցեղասպանության թեմայի՝ ՌԴ պետդումայում շրջանառության մեջ դրվելը այս փուլում արդյոք վիրավորակա՞ն չէ Հայաստանի համար:
«Բարոյական ընկալումների տեսակետից, իհարկե այդքան էլ հաճելի չէ, երբ քո ողբերգությունը, քո նկատմամբ իրականացված հանցագործությունն օգտագործվում է պահի թելադրանքով եւ ինչ-որ քաղաքական խնդիրներ լուծելու։ Սակայն մյուս կողմից, Ցեղասպանությունը քաղաքական հանցագործություն է եւ հետեւաբար նրա հետ կապված ամբողջ գործընթացն անխուսափելիորեն քաղաքական նպատակահարմարության, քաղաքական հաշվարկների եւ շահարկումների մեջ է ներգրավված։ Այդ առումով երեւի պետք է ընդունենք, որ այս թեման միշտ էլ օգտագործվել է եւ օգտագործվում է Թուրքիայի հետ ինչ-որ հարցեր լուծելու նպատակով։ Հետեւաբար, նաեւ կարողանանք առաջին պլան մղել արդյունքը եւ ոչ թե գործընթացի ընթացքում առաջացած անհարմարությունները։ Եթե ստացվի այնպես, որ բանաձեւը անցնի եւ սրա միջոցով մենք կարողանանք ինչ-որ չափով նորից ավելացնել ճնշումը Թուրքիայի նկատմամբ Հայոց ցեղասպանության ճանաչման եւ հետեւանքների վերացման առումով, ես միայն դրական կգնահատեմ գործընթացը»,-ասաց պարոն Մանուկյանը:
Մեր զրուցակիցը բացառում է պատերազմը Ռուսաստանի եւ Թուրքիայի միջեւ: Ասում է. «Որպես կանոն այնքան մեծ ռազմական եւ քաղաքական ներուժ ունեցող միջազգային խաղացողները նախընտրում են իրենց միջեւ առաջացած վեճերը լուծել այլ ավելի թույլ եւ խոցելի խաղացողների միջոցով։ Հենց այդ պատճառով, կարեւոր է, որ Հայաստանը սառնասրտություն եւ զգոնություն դրսեւորի, չներքաշվելով այս առճակատման մեջ։ Եթե Սիրիայի շուրջ զարգացումները եւ մասնավորապես ռուսական ինքնաթիռի խոցումը կարող է պատերազմի բերել, ապա դա, լինելու է ռուս-թուրքական ոչ թե դասական այլ «սառը պատերազմը»։ Իսկ այդպիսի «Սառը պատերազմը» շատ հավանական եմ համարում…»:
Գոհար ՀԱԿՈԲՅԱՆ
