«Ցավալիորեն պետք է ասեմ, որ իմ կողմից հարգված առաջին նախագահը հասել է մի մակարդակի, որի հայտարարություններն արդեն հանրային հետաքրքրություն չեն ներկայացնում»,- այսօր «Մեդիա կենտրոնում» «Սահմանադրական փոփոխություններ. սպասվող հանրաքվե» թեմայով քննարկմանն անդրադառնալով ՀՀ առաջին նախագահ Լևոն Տեր-Պետրոսյանի հայտարարություններին` այսպիսի կարծիք հայտնեց ՀՀ ԱԺ փոխնախագահ, ՀՀԿ խոսնակ Էդուարդ Շարմազանովը:
Նա այս առիթով մեջբերեց «խոսքը ուժ է, որը կրկնվելու դեպքում սպառվելու հատկություն ունի» դարձվածը ու նշեց. «Ցավում եմ, որ իմ երկրի առաջին նախագահի հարցազրույցներն այնքան են կրկնվել, որ նրա հայտարարություններն այլևս հանրային մեծ ուշադրության չեն արժանանում: Դա գուցե նրա ոչ սկզբունքային գործունեության արդյունքն է»:
Տաթև ՀԱՐՈՒԹՅՈՒՆՅԱՆ
