«Երբ օմբուդսմենը նոր էր ընտրվել, ես բավականին մեծ աջակցություն ցույց տվեցի նրան, որպեսզի դառնա հանրային հնչեղություն ունեցող անձնավորություն: Ցավում եմ, որ գործունեության մեջ փիարն սկսել է հաղթել բովանդակությանը: Եթե օմբուդսմենն իր համար նոր է բացահայտում, որ մենք կարիքավոր դպրոցներ ունենք, ցավում եմ, որովհետև այս երկրի քաղաքացի լինելով՝ նա պարտավոր էր դա իմանալ ի սկզբանե. անպայման չէ օմբուդսմեն լինես, որ իմանաս՝ քո դպրոցներում պրոբլեմ կա»,- ասում է ՀՀ կրթության և գիտության նախարար Արմեն Աշոտյանը՝ արձագանքելով Մարդու իրավունքների պաշտպան Կարեն Անդրեասյանի երեկվա հաղորդագրությանը՝ կապված Կրթության և գիտության նախարարության ենթակայության տակ գտնվող Երևանի թիվ 16 հատուկ դպրոցի կարիքների հետ:
«Իհարկե, դպրոցը ԿԳՆ-ի ենթակայության տակ է, և այդ ամենը մենք առանց նրա շոուների էլ գիտենք: Երևի կոմպլեքսավորված է մնացել ԱԺ վերջին քննարկումներից հետո, բայց ԿԳՆ-ն այն դաշտը չէ, որտեղ կարելի է վերականգնել խարխլված հեղինակությունը: Ինչևէ, եթե օմբուդսմենի գրասենյակը հարցին մասնագիտորեն մոտենար, կհասկանար, որ ահազանգը պետք է ուղարկեր այլ գերատեսչություն՝ Քաղաքաշինության նախարարություն»,- ասում է Արմեն Աշոտյանը և ընդգծում. «Եթե օմբուդսմենի գրասենյակի համար մարդու իրավունքների պաշտպանության հետ կապված բոլոր խնդիրները համարվում են լուծված, և մնացել են դպրոցների շենքերի հարցերը, ապա կարող եմ նրան տալ այն դպրոցների ցանկը (մոտ 300 դպրոց), որոնք հիմնանորոգման ու այլ կարիքներ ունեն, և շաբաթը մեկ մի հաղորդագրություն կարող է տարածել՝ իր աշխատանքը վերածելով սերիալի»:
Սիրանուշ ՀԱՅՐԱՊԵՏՅԱՆ
//Երբ օմբուդսմենը նոր էր ընտրվել, ես բավականին մեծ աջակցություն ցույց տվեցի նրան, որպեսզի դառնա հանրային հնչեղություն ունեցող անձնավորություն // – Ուշադիր կարդալով այս արտահայտությունը կարելի է գաղափար կազմել հայ չինովնիկի տիպական ինքնափքվածության մասին: Հետաքրքիր է, մարդիկ երբեւէ մտածում են թե իրենք ինչի որ մասին կարող են նմանվել: