Քիչ առաջ ՀՀ Վերաքննիչ քրեական դատարանը (նախագահող դատավոր՝ Սերգեյ Չիչակյան) մերժեց Հայկ Կյուրեղյանի վերաքննիչ բողոքը: Հիշեցնենք, որ Կենտրոն եւ Նորք-Մարաշ վարչական շրջանների ընդհանուր իրավասության դատարանի բակում կրակոցներ արձակած Հայկ Կյուրեղյանը մեղավոր է ճանաչվել խուլիգանության եւ իշխանության ներկայացուցչի նկատմամբ բռնություն գործադրելու մեջ եւ սեպտեմբերի 15-ին դատապարտվել 9 տարվա ազատազրկման:
Կյուրեղյանը Վերաքննիչ դատարանից պահանջում է՝ վերացնել Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավճիռը, վերացնել իր իրավունքների խախտումները եւ կայացնել գործն, ըստ էության, լուծող նոր դատական ակտ:
Դատարանն առանց պատճառաբանության մերժեց բողոքը: Հարցին` ի՞նչ միջնորդություն ունի, Հայկ Կյուրեղյանը պատասխանեց, որ ցանկանում է` իրեն տրամադրվեն դատական նիստերի տեսագրությունները, քանի որ ինքը դրանց ներկա չի եղել:
Հայկ Կյուրեղյանի հայրը` Արմենակ Կյուրեղյանը տեղեկացրեց, որ իրենք դիմելու են Մարդու իրավունքների եվրոպական դատարան: Նա նաև նշեց, թե «այս իրավական համակարգի պայմաններում դատարանից այլ բան չէինք էլ սպասում»:
Կարդացեք նաև
Տաթև ՀԱՐՈՒԹՅՈՒՆՅԱՆ
