ՀՀ կրթության և գիտության նախարար Արմեն Աշոտյանն այսօր ներկայացրեց կրթության զարգացման 2016-2025 թթ. պետական ծրագիրը: Առաջին անգամ կառավարությունը մշակել է տասնամյա կրթական ծրագիր (մինչև այժմ եղածները հնգամյա էին): Երկարաժամկետ է, որպեսզի կրթությունն ապահովագրվի քաղաքական փոփոխությունների ռիսկերից: Կրթության առաջիկա 10 տարվա ծրագիրը մշակվել է՝ միջազգային փորձը հաշվի առնելով:
«Բավականին հավակնոտ և իրատեսական ծրագիր է, քանի որ մենք չենք ուզում ամրագրել այն, ինչ ունենք, մենք ավելի լավն ենք ուզում, այսինքն՝ այնքանն ենք ուզում, ինչքանին կարող ենք հասնել, եթե լարենք մեր կազմակերպական, մասնագիտական, ֆինանսական ներուժը»,- ասաց Ա. Աշոտյանը:
Նոր ծրագրով նախատեսվում է վերանայել կրթության ֆինանսավորման աղբյուրները, ավելացնել մասնավոր ներդրումների մասնաբաժինը, բայց ոչ թե բարեգործության, այլ երկարատև ներդրումների:
Ծրագիրն ակտիվ քննարկվում է մասնագիտական հարթակում. «Կրթությունը հանրային արժեք է, և հանրությունն էլ պետք է ակտիվ մասնակցի նոր ծրագրի քննարկումներին: Դրանից հետո կառավարությունը ծրագիրը կներկայացնի Ազգային ժողով: Այն իր վերջնական տեսքը կստանա միայն Ազգային ժողովում: Կարծում եմ, որ մինչև 2016 թ. մայիսը կունենանք ամբողջական ծրագիրը, որովհետև աշխատանքը ոչ միայն ծավալուն է, այլև պետք է համադրվի Ազգային ժողովի օրակարգի հետ»,- նշեց նախարարը:
Կարդացեք նաև
Սիրանուշ ՀԱՅՐԱՊԵՏՅԱՆ
