«Հիկարի» հայ-ճապոնական կենտրոնում այսօր հյուրընկալվել էր Ճապոնիայի «Կաբուկի» ավանդական թատրոնի դերասանուհի Շիրոտանի Սայոկոն: Նա ցուցադրեց ճապոնական բազմադարյա մշակույթի տարբեր ժանրեր: Ներկայացնելով հյուրին՝ ՀՀ-ում Ճապոնիայի արտակարգ և լիազոր դեսպան Էյջի Տագուչին նշեց, որ Սայոկոն իր երկրում ճանաչված պրոֆեսիոնալ դերասանուհի է. «Մոտ 20 տարի առաջ նա սկսել է Ռուսաստանում ճապոներեն դասավանդել: Մեկ շաբաթ առաջ եղել է Սանկտ-Պետերբուրգում, որտեղ դասավանդում է եւ հատուկ այսօրվա համար ժամանել է Երեւան, իսկ վաղը կվերադառնա Պետերբուրգ»:
DCIM105MEDIA
DCIM105MEDIA
DCIM105MEDIA
DCIM105MEDIA
Շիրոտանի Սայոկոն ներկայացրեց ճապոնական «Անականջ Հոյիջի» հայտնի ավանդազրույցը, որը երաժշտական գործիքի նվագակցությամբ ասմունքող կույր տղամարդու մասին է. «Փոքր ինչ սարսափելի պատմություն է: Հոյիջին նվագում էր ճապոնական բիվա գործիքը եւ պատմում հայտնի «Թայրա» ընտանիքի մասին: Նրա պատմություններն այնքան հիասքանչ էին, որ անգամ ուրվականներն էին գալիս լսելու: Նրանք փորձում են Հոյիջիին իրենց հետ տանել մեռյալների աշխարհ: Իմանալով այդ մասին՝ վանականը Հոյիջիի մարմնին «սուտրա» է գրում, որպեսզի պաշտպանի ուրվականներից: Սակայն նա մոռանում է ականջների վրա գրել, եւ ուրվականները պոկում-տանում են դրանք: Չգիտեմ՝ Հոյիջին իսկապես գոյություն ունեցել է, թե ոչ, բայց Ճապոնիայում բավականին հայտնի պատմություն է»,-Aravot.am-ի հետ զրույցում ասաց դերասանուհին:
Նա նշեց, որ շատ բան չի հասցրել իմանալ Հայաստանի մասին. «Լսել եմ, որ Երեւանը Ադամի եւ Եվայի քաղաքն է: Նաեւ հայկական տարբեր մեղեդիներ եւ երգեր եմ լսել, շատ գործեր հավանեցի, բայց ավելի շատ՝ «Ծիծեռնակ» երգը: Գեղեցիկ է բավականին եւ կարծես հայերի ոգին է արտահայտում»:
Միջոցառման ընթացքում Սայոկոն նաեւ ճապոնական պար ցուցադրեց, որոշ շարժումներ էլ սովորեցրեց ներկաներին:
Կարդացեք նաև
Լուիզա ՍՈՒՔԻԱՍՅԱՆ
