«Լրատվամիջոցների վրա ֆինանսական ռեսուրսներ ծախսելու հնարավորությունը իշխող կուսակցությունն ունի տասնապատիկ, եթե ոչ ավելի անգամ, քան բոլոր մնացած քաղաքական ուժերը միասին վերցրած»
Խոսքի ազատության պաշտպանության կոմիտեն նոյեմբերի 28-ին եւ 29-ին Ծաղկաձորում «Հայաստանյան լրատվամիջոցների ներկա վիճակն ու զարգացման հեռանկարը» թեմայով կոնֆերանս է կազմակերպել:
Կոնֆերանսի ընթացքում Երեւանի մամուլի ակումբի նախագահ Բորիս Նավասարդյանը ասաց, որ Երեւանի մամուլի ակումբը հոկտեմբերի 26-ից սկսած քարոզարշավի մշտադիտարկում է իրականացնում: Նա նշեց, որ հակասական է օրենքով քարոզարշավի համար միայն խորհդարանական կուսակցություններին հեռարձակվող լրատվամիջոցներում հավասար հնարավորություններ տալը:
«Մեր մշտադիտարկման արդյունքը ցույց է տալիս, որ մի շարք հեռուստաընկերություններ, ելնելով օրենքի այդ հուշող մոտեցումից, որովհետեւ օրենքը չի էլ սահմանափակում (ինքը չի ասում, որ միայն այս վեցին պետք է լուսաբանես, բայց առանձնացնում է, որ այս վեցին՝ պարտադիր), դա որպես հրահանգ են ընդունում ոչ ֆորմալ եւ լուսաբանում են միայն այդ վեցին: Ստեղծված են քաղաքացիական նախաձեռնություններ հենց քարոզչության համար, հենց հանրաքվեի համար, բացարձակապես զրո, կարծես թե նրանք չկան, կա մեզ մոտ փորձագիտական հանրություն, որտեղ նույնպես շատերը կարծիքներ ունեն արտահայտելու եւ մոտեցումներ ներկայացնելու, կան հասարակական կազմակերպություններ, էլի մի շարք հեռուստաալիքներով նրանք գոյություն չունեն: Կան իհարկե՛, դրական բացառություններ, օրինակ՝ «Երկիր մեդիա» հեռուստաընկերությունը, որտեղ քաղաքացիական հասարակությունը նույնիսկ ավելի լավ է ներկայացված, քան Դաշնակցություն կուսակցությունը»,- ասաց նա:
Կարդացեք նաև
Բորիս Նավասարդյանը հայտարարեց, որ նոյեմբերի 6-19 ընկած ժամանակահատվածում Հանրապետական կուսակցությունը մնացած կուսակցություններից 10 անգամ շատ քարոզչական ժամանակ է ստացել, իսկ համեմատելով ՀՀԿ-ի վճարովի քարոզչության ժամանակը եւ «Ոչ»-ի ճակատինը, ստացվում է 26 անգամ ավելի. «Դա նշանակում է, որ լրատվամիջոցների վրա ֆինանսական ռեսուրսներ ծախսելու հնարավորությունը իշխող կուսակցությունն ունի տասնապատիկ, եթե ոչ ավելի անգամ, քան բոլոր մնացած քաղաքական ուժերը միասին վերցված: Եվ մենք խոսում ենք նրա մասին, որ այս սահմանադրական փոփոխություններով այդ միակուսակցական համակարգը կամ ավտորիտար համակարգը մենք կհաղթահարենք, ինչի՞ շնորհիվ, շատ դժվար է հասկանալ»:
Ամի ՉԻՉԱԿՅԱՆ
