«Ըստ երեւույթին, եթե մենք խոսում ենք ահաբեկչական խմբավորումների մասին, չեմ կարծում, որ մեր բնակչությունը պատրաստ կլիներ, որ այդ ահաբեկչական խմբավորումները կլինեն Հայաստանի ներսից, ոչ թե դրսից»,- այս մասին, «Sputnik Արմենիա» միջազգային մամուլի կենտրոնում լրագրողների հետ հանդիպմանն, ասաց Գելլափ Ինթերնեյշնլ Ասոցիացիայի ներկայացուցչության տնօրեն Արամ Նավասարդյանը:
Լրագրողները, մասնավորապես, հետաքրքրվել էին, թե արդյոք Հայաստանի բնակիչները պատրա՞ստ էին «ահաբեկչության խմբավորման» ի հայտ գալուն: Խոսքն օրերս ԱԱԾ-ի կողմից Նորք Մարաշում զինված խմբավորման բացահայտման եւ ձերբակալման մասին է:
Գելլափ Ինթերնեյշնլ Ասոցիացիային «Սիրիայում Ռուսական ավիահարվածների վերաբերյալ ՀՀ բնակչության արձագանքը» թեմայով հարցում է իրականացրել, որի ընթացքում Հայաստանի քաղաքացիների 8%-ը մտահոգություն է հայտնել, որ Հայաստանը կարող է դառնալ ահաբեկչական խմբավորումների թիրախ: «Իրենց մոտ այդ վտանգների սպասումը դրսից է եւ ոչ թե ներսից»,- ասաց Արամ Նավասարդյանը:
Նա նշեց, որ իրենց հարցումների ժամանակահատվածը չի համընկնում վերջին իրադարձությունների հետ. «Կարծում եմ, եթե մենք հիմա իրականացնենք հարցումներ, այնուամենայնիվ մենք նոր զարգացումների, ռուս-թուրքական հարաբերություններում Հայաստանի դերի մասին արձագանքը կտեսնենք»:
Կարդացեք նաև
Արամ Նավասարդյանը նաեւ ասաց, որ լարվածություն կամ արտառոց ինչ-որ բան հայերի շրջանում չեն նկատել. «Ժողովուրդն իր կյանքով, իր առօրյայով ապրում է: Ելնելով նրանց արձագանքից մեր հարցմանը, ես չեմ կարծում, որ վախեցած կամ ահաբեկված են»:
Աշոտ ԻՍՐԱԵԼՅԱՆ
