Գելլափ Ինթերնեյշնլ Ասոցիացիայի ներկայացուցչությունը հոկտեմբերի 23-31-ը Հայաստանում հարցում է անցկացրել «Սիրիայում ռուսական ավիահարվածների վերաբերյալ ՀՀ բնակչության արձագանքը» թեմայով: Հարցմանն, ընդհանուր առմամբ, մասնակցել են 1104 հոգի:
Այսօր «Sputnik Արմենիա» միջազգային մամուլի կենտրոնում ներկայացուցչության տնօրեն Արամ Նավասարդյանը, ներկայացնելով արդյունքներն, ասաց, որ հարցվածների 92%-ն են տեղյակ եղել Սիրիայում ընթացող քաղաքացիական պատերազմի մասին:
Ըստ պարոն Նավասարդյանի՝ հարցվածների 52%-ը կարծում է, որ Սիրիայում տիրող իրավիճակի համար մեղավոր է ԱՄՆ-ն, 23%-ը՝ ահաբեկչական խմբավորումները, Թուրքիան՝ 15%-ը, Սիրիայի իշխանությունները եւ նախագահ Բաշար Ասադը՝ 15%-ը, Սիրիայի ընդդիմությունը՝ 8%, Ռուսաստանը՝ 6%, եվրոպական երկրները՝ 5% եւ այլն:
Սեպտեմբերի 30-ից Սիրիայում «Իսլամական պետության» դիրքերին Ռուսաստանի կողմից հասցվող ավիահարվածներին լիովին դրական գնահատական են տվել հարցվածների 39%-ը: Ընդհանրապես բացասական գնահատական են տվել հարցվածների 8%-ը: Մնացածները տարբեր կարծիքներ են հայտնել:
Կարդացեք նաև
Արամ Նավասարդյանը նշեց, որ հարցված քաղաքացիների 23%-ն են կարծում, որ Ռուսաստանի այս քայլը կնպաստի Սիրիայի քառամյա պատերազմի ավարտին:
Հարցվածներին խնդրել են պատասխանել, թե ո՞րն է Սիրիայում ռազմական գործողություններին Ռուսաստանի մասնակցության հիմնական նպատակը: 39%-ը պատասխանել են, որ Ռուսաստանը ցանկանում է Արեւելքում իր գերակայությունը հաստատել: 21%-ը կարծում են, որ նպատակն ԱՄՆ-ի դերը նվազեցնելն է: Այլ պատասխանների մեջ են ԱՄՆ-ի եւ Ռուսաստանի ուժերի բալանսավորում, Բաշար ալ Ասադի իշխանության պաշտպանություն եւ Արեւմուտքի հետ հարաբերությունների կարգավորում:
Արամ Նավասարդյանը նշեց, որ հարցվածների 55%-ը կարծիք են հայտնել, որ Ռուսաստանի գործողությունները Սիրիայում չեն անդրադառնա Հայաստանի վրա: 17%-ը մտահոգություն են հայտնել, որ Սիրիայի հայկական համայնքը կարող է թիրախավորվել, 8%-ը՝ կարծիք են հայտնել, որ Հայաստանը կարող է դառնալ ահաբեկիչների թիրախ:
Աշոտ ԻՍՐԱԵԼՅԱՆ
