Նոյեմբերի 28-ին աստվածամուխ Սուրբ գեղարդը կիջեցվի Ս. Էջմիածնի Մայր տաճար: Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի Հայրապետական սրբատառ կոնդակով, Հայոց եկեղեցու հիմնադիրներ Սուրբ Թադեոս և Սուրբ Բարդուղիմեոս առաքյալների տոնը հռչակվել է աստվածամուխ Սուրբ Գեղարդի ուխտի օր: Այս մասին այսօր լրագրողների հետ հանդիպմանն ասաց Մայր Աթոռի ձեռագրատան, արխիվի եւ թանգարանների տնօրեն Տեր Ասողիկ քահանա Կարապետյանը:
Նրա խոսքով՝ Սուրբ գեղարդը համաքրիստոնեական սրբություն է, որն առաջին դարից պահվում է Հայ առաքելական եկեղեցում. «Գեղարդը Հայաստան աշխարհ է բերել սուրբ Թադեոսը, որը Բարդուղիմեոս առաքյալի հետ միասին հանդիսանում է հայոց եկեղեցու հիմնադիրը: Առաջին դարից գեղարդը պահվել է Արեւմտյան Հայաստանում՝ Վասպուրական աշխարհի Արտազ գավառում, որտեղ առաքյալը նահատակվել է: Դրանից հետո 12-դարից պահվել է Այրիվանքում՝ ներկայիս Գեղարդավանքում: 13-րդ տարում պատրաստվել է գեղարդի նոր արծաթե մասնատուփը: Այդ մասին վկայում են Մեծ Հայքի եւ Կիլիկյան Հայաստան ուխտի եկած մատենագիրները: Երբեւէ որեւէ եկեղեցի կասկած չի ունեցել, որ աստվածամուխ գեղարդը պահվում է հայոց եկեղեցում»,-մ եջբերելով պատմագիտական աղբյուրների տվյալներն՝ ասաց Տեր Ասողիկը:
Նա նշեց, որ ըստ Միխայիլ Ասորի պատմիչի վկայության՝ ժամանակին Անտիոքում հայտնված գեղարդը կրկնօրինակ է եւ «բուն գեղարդը պահվում է ի հայս»:
Կարդացեք նաև
Բանախոսի փոխանցմամբ՝ 18-րդ դարի երկրորդ կեսին Գեղարդավանքն ամայացել էր, եւ որպեսզի սրբությունները ավազակների ավար չդառնային, Նոյան տապանի մասունքը եւ աստվածամուխ գեղարդը տեղափոխվել են Մայր Աթոռ Սուրբ Էջմիածին. «Սիմեոն Երեւանցի կաթողիկոսը, ով առաջինն է կազմել սրբությունների ցուցակը, հիշատակել է Սուրբ գեղարդը»:
Տեր Ասողիկը փաստեց, որ սրբալույս մյուռոնի օրհնությունը կատարվում է երեք սրբությունների գործածմամբ, այդ թվում՝ Սուրբ գեղարդի. «Այն մեզ համար ոչ միայն պատմականորեն է ընդունելի, այլեւ հրաշագործությունների աղբյուր է: Այդ հրաշքները հայտնի են ոչ միայն հայերի, այլեւ վրացիների եւ կովկասյան մահմեդականների շրջանում: Գեղարդի զորությամբ եւ մարդկանց հավատքով ժամանակին փարատվել է ժանտախտը»:
Հավելենք, որ Մայր տաճարում Սուրբ Թադեոս և Սուրբ Բարդուղիմեոս առաքյալների տոնի առիթով կմատուցվի պատարագ: Սուրբ գեղարդը Մայր Տաճարում կմնա մինչև նույն օրվա երեկո:
Լուիզա ՍՈՒՔԻԱՍՅԱՆ
