Հաճախակի հանդիպող երիկամների հիվանդություն համարվող պիելոնեֆրիտը ունի մանրէածին, բորբոքային բնույթ: Այս հիվանդության պատճառները տարբեր են լինում` պայմանավորված բորբոքված միզապարկից, աղիներից եւ սեռական օրգաններից հիվանդածին մանրէների տվյալ օրգան ներթափանցմամբ: Քրոնիկական պիելոնեֆրիտը կանանց մոտ շատ հաճախ առաջանում է հղիության ընթացքում, եթե հղիները ունեն նեֆրապաթիա, ինչպես նաեւ շաքարային դիաբետ:
Տարբերվում են հիվանդության սուր եւ քրոնիկական ընթացքներ: Սուրն առաջանում է հանկարծակի: Առաջնային ախտանիշը բարձր ջերմությունն է՝ մինչեւ 40 աստիճան, որն ուղեկցվում է դողէրոցքով:
Հիվանդին տանջում են սրտխառնոցը, գլխացավը եւ գոտկատեղի շրջանում ցավերը, ինչպես նաեւ հաճախացած շնչառությունը, փորկապությունը, աղիների վքնածությունը: Մեզը դառնում է պղտոր, թարախային նստվածքով: Պարունակում է նաեւ զգալի քանակությամբ արյան սպիտակ գնդիկներ, մանրէներ, սպիտակուց` ոչ շատ: Արյան քննության ժամանակ նկատվում է էրիթրոցիտների նստվածքային արագացում:
Քրոնիկական պիելոնեֆրիտը ընթանում է հաճախակի սրացումներով, ուղեկցվում է արյան բարձր ճնշմամբ` վաղ թե ուշ հանգեցնելով երիկամային անբավարարության:
Կարդացեք նաև
Օրգանիզմի դիմադրողականությունը բարձրացնելու, ինչպես նաեւ հետագա սրացումները կանխելու նպատակով նախընտրելի են հետեւյալ բուժական հավաքները. 10 գրամ անտառային գետնամորու տերեւներ, 10 գրամ եզան լեզվի տերեւներ, նույնքան կեչու տերեւներ: Այնուհետեւ 10 գրամ ձիաձետ դաշտային` վերգետնյա մասը, 20 գրամ օրտոսիֆոն առէջքային վերգետնյա մաս, 20 գրամ հազարատերեւուկ, դարձյալ վերգետնյա մասը, 20 գրամ մարուղենու տերեւներ եւ 20 գրամ կտավատի սերմեր: 1 ճաշի գդալ խառնուրդը լցնել 1 բաժակ եռացող ջրի մեջ, եռացնել 10 րոպե: Թրմել մեկ ժամ, խմել 1/3-1/2 բաժակ, օրական 3-4 անգամ, ուտելուց առաջ:
Պիելոնեֆրիտի ժամանակ դեղաբույսերով բուժումը հիմնականում ուղղվում է միզային վարակի դեմ: Դեղաբույսերին զուգընթաց խորհուրդ է տրվում առատորեն օգտագործել ըմպելիքներ եւ հյութեր:
Միզամուղ եւ հակաբորբոքային ազդեցություն ունեցող հավաք է` 10 գրամ կեչու տերեւներ, 10 գրամ մարուղենու տերեւներ, նույնքան ձրաձետ դաշտային` վերգետնյա մասը, 10 գրամ խատուտիկի արմատ, 10 գրամ գիհի հատապտուղներ: Հավաքին ավելացնել 20 գրամ կարմիր հապալասենու տերեւներ, 20 գրամ կտավատի սերմեր եւ 10 գրամ մատուտակի արմատ:
Այս խառնուրդով պատրաստել թեյ, խմել 150 միլիգրամ, օրական 4 անգամ, ուտելուց 30 րոպե առաջ: Այս դեպքում նախընտրելի է զուգակցել դեղորայքային բուժման հետ:
«Առավոտ» օրաթերթ
26.11..2015
