Տեխնիկական գիտությունների դոկտոր Վահան Համազասպյանը Հայաստանի տնտեսական խնդիրների լուծումը տեսնում է երկրի հելիոֆիկացման մեջ: Նա վստահեցնում է, որ արևային էներգիայի ճիշտ օգտագործումը մեր երկրին մեծ օգուտներ կբերի:
«Արդեն 22 տարի է՝ մենք զբաղվում ենք արևային տեխնիկայի զարգացման հարցերով: Մեր կազմած հելիոֆիկացման ծրագիրը շատ հարմար է Հայաստանի համար, սակայն մեր ղեկավարները դա չեն հասկանում, և ծրագիրը չի հաջողվում կյանքի կոչել Հայաստանում»,- այսօր լրագրողների հետ հանդիպման ժամանակ ասաց Վահան Համազասպյանը:
Տեխնիկական գիտությունների թեկնածու Գրիգոր Մնացականյանն օրերս մասնակցել է հելիոֆիկացման ծրագրերին նվիրված Կիևի համաժողովին՝ ներկայացնելով հիշյալ ծրագիրը:
«Ես սկզբունքորեն դեմ եմ նման մոտեցմանը: Ծրագիրը ստեղծված է Հայաստանի համար, բայց իրադարձությունները ստիպում են, որ մենք դիմենք այդպիսի քայլերի: Փորձում ենք ինչ-որ ելքեր գտնել: Եվ ծրագիրը Կիևում ներկայացնելը դրանցից մեկն էր: Մենք դժգոհ ենք իշխանությունների բռնած դիրքից, հատկապես Էներգետիկայի նախարարությունից: Այսօր, երբ Հայաստանը չունի տնտեսական զարգացման լուրջ հեռանկարներ, ինչպե՞ս կարելի է անտեսել այս ծրագիրը»,- զարմանում է Վ. Համազասպյանը:
Կարդացեք նաև
Գրիգոր Մնացականյանի փոխանցմամբ՝ Կիևի համաժողովում մեծ հետաքրքրություն է առաջացրել հելիոֆիկացման իրենց ծրագիրը:
«Տարբեր առաջարկություններ եղան, բայց ամենածանրակշիռը մեր ներկայացրած ծրագիրն էր: Մեր ներկայացրած սարքավորումները՝ արևային էներգիայի խտացուցիչները, այնտեղ լուրջ հետաքրքրություններ առաջացրին: Եթե կա էլեկտրաֆիկացիա, կա գազաֆիկացիա, ինչո՞ւ չլինի նաև հելիոֆիկացիա:
Համաժողովի ժամանակ նաև որոշվեց, որ մասնակից երկրներից ամեն մեկն իր երկրում փորձնական հելիոֆիկացնի մեկական գյուղ: Դրանից հետո նորից հանդիպենք և քննարկենք արդյունքները: Հուսով եմ, որ մեր իշխանությունները կփորձեն Հայաստանում գոնե մեկ էկոգյուղ ունենալ»,- ասաց Գ. Մնացականյանը:
Սիրանուշ ՀԱՅՐԱՊԵՏՅԱՆ
