Արմեն Աշոտյանն ուզում է հավատալ,
որ Նիկոլ Փաշինյանն ազնիվ մղումներ ունի
ԱԺ-ում 2016-ի պետական բյուջեի քննարկման ժամանակ ՀԱԿ խմբակցության պատգամավոր Նիկոլ Փաշինյանն առաջարկեց ուշադրություն դարձնել սահմանամերձ գյուղերին. «Իրականացվում է եւ նախատեսված է ծրագիր տարրական դասարաններում եւ նախակրթարաններում սովորող երեխաներին սննդով ապահովելու վերաբերյալ: Բազմաթիվ սահմանամերձ գյուղեր այս ծրագրից դուրս են մնում: Ճիշտ չե՞ք համարում, որ առաջին հերթին ապահովվեին սահմանամերձ գյուղերի երեխաներին: Ստեղ գյուղեր են ընկնում սրա տակ, որ Հայաստանի ամենաառատ գյուղերն են՝ հազարավոր հեկտարներով հողատարածքներով, իսկ այնտեղ մարդիկ իրենց հողերը չեն կարողանում մշակել: Ես կոչ եմ անում ձեզ, որ միջնորդեք ու կառավարությանն ասեք, որ սենց չի՛ կարելի անել»:
Փաշինյանի այս կոչն ուղղված էր ԱԺ պաշտպանության, ազգային անվտանգության եւ ներքին գործերի մշտական հանձնաժողովի նախագահ Կորյուն Նահապետյանին:
Ըստ Նիկոլ Փաշինյանի՝ Մովսես գյուղի աշակերտը ամեն օր թշնամու ուղիղ նշանառության տակ գնում է դասի. «Նրա համար այս սննդի ծրագիրը չեք անում, Արարատյան դաշտի էլի մեր սիրելի աշակերտներին անում եք: Առաջնահերթությունների խնդիր կա, չէ՞»:
Այս առնչությամբ «Առավոտի» հետ զրույցում ԿԳ նախարար Արմեն Աշոտյանը պատասխանեց պատգամավորի հարցադրմանը. «Մենք հերթով ընդգրկում ենք նոր մարզեր: Պարոն Փաշինյանը նոր է հիշել այդ դպրոցական ծրագրի մասին, որը 3 տարի գոյություն ունի, մենք ի սկզբանե ծրագրի ակունքներում ենք եւ ընդգրկել ենք ոչ պակաս ռազմավարական նշանակություն ունեցող մարզեր՝ սկսելով Սյունիքից, Վայոց ձոր, Արարատ»:
Ըստ նախարարի՝ այն, որ պատգամավորը հետաքրքրված է սահմանամերձ գյուղերի խնդիրներով, ողջունելի է միանշանակ. «Բայց որպեսզի այդ հետաքրքրվածությունը ազնիվ դիտարկվի, կարծում եմ, ճիշտ կլինի՝ ինքը տիրապետի նաեւ մեր կողմից իրականացված ծրագրերին եւ խնդրի մասին բարձրաձայնի ոչ միայն պետական բյուջեի քննարկման շրջանակներում, այլեւ շուրջ տարի»:
Մեր հարցին՝ այսինքն՝ առաջնահերթությունների խնդիր չկա՞, նախարարը պատասխանեց. «Առաջնահերթությունների խնդիր ծրագրում ի սկզբանե դրվել է՝ ելնելով աշխարհագրական դիրքից: Սյունիքը պակա՞ս ռազմավարական մարզ է, քան Տավուշը: Կարծում եմ՝ սրա շուրջ անիմաստ բանավեճ պետք է ծավալենք, թե որն է ավելի ռազմավարական մարզ: Բայց Սյունիքում պակա՞ս դրա կարիքն ունեին 2 տարի առաջ»:
Արմեն Աշոտյանը նշեց, որ նույն դասարանում կարող է լինել եւ շատ ապահովված ընտանիքի երեխա, բայց դու չես կարող դասարանի մի երեխային սնունդ տաս, մյուսին՝ ոչ՝ հաշվի առնելով սոցիալական կարգավիճակը:
Կարդացեք նաև
«Արարատի մարզի վրա սեւեռվելը պատգամավորի կողմից գուցե ունի քաղաքական ենթատեքստ, բայց այդ ենթատեքստը անիմաստ է, որովհետեւ նույն Արարատի մարզում է Երասխ գյուղը, որի շուրջ ծավալված մարտերի մասին, կարծում եմ, դեռ ինքն էլ հիշողության մեջ պետք է պահպանած լինի: Ինչ վերաբերում է առաջնահերթությանը, մենք պատրաստ ենք իր հետ քննարկել: Ամեն երեխայի համար օրական հատկացնում ենք 140 դրամ: Սահմանապահ համայնքների մի մասը արդեն ծրագրում են: Հարցադրումը ես ազնիվ եմ ընդունում, բայց դա ոչ շատ տեղեկացված մարդու հարցադրում է: Եթե առաջարկում են ընդլայնել համայնքների թիվը կամ ընդգրկել ոչ թե մարզը, այլ կոնկրետ համայնքներ, պատրաստ եմ քննարկել,- ասաց Արմեն Աշոտյանը՝ ավելացնելով, որ 50 մլն դրամ է հատկացվել 2200 աշակետների համար:- Եթե պատգամավորը հանդես գա բյուջետային առաջարկությամբ, պատրաստ ենք աշխատել: Ես ուզում եմ հավատալ, որ Նիկոլ Փաշինյանի մղումն ազնիվ է, եւ ազնիվ արձագանք ենք տալիս»:
ՀՌԻՓՍԻՄԵ ՋԵԲԵՋՅԱՆ
«Առավոտ» օրաթերթ
25.11..2015
