Նախօրեին տեղի ունեցավ Սոցիալ Դեմոկրատ Հնչակյան Կուսակցության կենտրոնական վարչության լիագումար նիստ, որին, ներկուսակցական, կազմակերպչական հարցերի հետ մեկ տեղ, քննարկվեց հայությանը և Հայաստանին հուզող մի շարք հարցեր:
Նիստում ՍԴՀԿ կենտրոնական վարչությունը ողջունեց Հայոց ցեղասպանության 100-րդ տարելիցի միջոցառումները համակարգող պետական հանձնաժողովի որոշումը՝ այն է Համահայկական խորհրդի ստեղծումը: Հնչակյան կուսակցությունը հույս հայտնեց, որ շուտով կկազմվի հայեցակարգ և Համահայկական խորհուրդը, որպես գործուն մեխանիզմ, կյանքի կկոչվի՝ համահայկական մի շարք ծրագրեր իրագործելով:
Նաև արժևորվեց և բարձր գնահատվեց Պետական հանձնաժողովի Հայոց ցեղասպանության 100-րդ տարելիցին նվիրված քաղաքական և մշակութային միջոցառումները հայությանն ու աշխարհին հավուր պատշաճի ներկայացնելը: Ինչն, անկասկած, ստվեր նետեց հենց Ապրիլի 24-ին Թուրքիայում կազմակերպված, այսպես կոչված՝ Գալիպոլիի ճակատամարտի 100-ամյակին նվիրված տոնակատարությանը, որով Թուրքիան փորձում էր աշխարհի ուշադրությունը շեղել Հայոց ցեղասպանության 100-րդ տարելիցին Հայաստանում և աշխարհում տեղի ունեցող միջոցառումներից: Շեշտվեց նոր հանգրվանին պահանջատիրության հարցը իրավական հարթություն տեղափոխելու նախաձեռնությունը:
Տարածաշրջանային իրադարձությունները նույնպես քննվեցին նիստի օրակարգում. Կենտրոնական վարչությունն անդրադարձավ Թուրքիայի բացասական դերակատարությանը Մերձավոր Արևելքի հակամարտության գոտում, իսկ նոյեմբերի 1-ին Թուրքիայում կայացած խորհրդարանական ընտրությունները որակվեցին որպես հետ քայլ՝ երկրում ազգային փոքրամասնությունների իրավունքների ոտնահարման և խոսքի ազատության սահմանափակման աննախադեպ աճի պատճառով:
Կարդացեք նաև
Իսկ ներհայաստանյան զարգացումներին անդրադառնալով՝ ՍԴՀԿ կենտրոնական վարչությունը կենտրոնացավ առաջիկա Սահմանադրական բարեփոխումների հանրաքվեին, կողմ լինելով գործող համակարգի փոփոխությանը, հույս հայտնեց, որ Հայաստանում Սահմանադրական փոփոխությունները միտված կլինեն ոչ միայն իրավական, այլև տնտեսական և ընկերային հարաբերությունների խթանմանն ու բարելավմանը:
Լիագումար նիստում անդրադարձ եղավ սիրիահայ համայնքի այսօրվա խնդիրներին և սիրիական պատերազմի պատճառով տնտեսական և ընկերային ծանր պայմաններում գտնվող մեր համայնքին, ինչպես նաև նրանց անվտանգության խնդիրներին: Առաջարկվեց շարունակել հետամուտ լինել Սիրիայի հայրենակիցների օգնության և աջակցության գործում:
Սոցիալ Դեմոկրատ Հնչակյան Կուսակցության կենտրոնական վարչությունը լիագումար նիստի ավարտին վերահաստատեց իր դիրքորոշումը՝ շարունակել միասնականությամբ դիմագրավել հայությանն ու համազգային առկա խնդիրներին և մարտահրավերներին:
Սոցիալ Դեմոկրատ Հնչակյան Կուսակցության կենտրոնական վարչություն
