«Չեմ հասկանում`դուք ինչո՞վ եք պակաս Վրաստանից»,- այս հարցն այսօր հնչեցրեց Հայաստանում ԵՄ պատվիրակության ղեկավար Պյոտր Սվիտալսկին`կոռուպցիայի դեմ պայքարի շրջանակներում դոնոր կազմակերպությունների հետ քննարկման ժամանակ: Նա հղում արեց «Թրանսփերենսի ինթերնեյշնլ» կազմակերպության վարկանիշային աղյուսակին, որտեղ 176 երկրների մեջ Հայաստանը 96-րդ տեղում է, ՌԴ-ն`161, մեր հարեւան Վրաստանը`56-րդ: «Վրաստանն ավելի լավ վարկանիշ ունի, քան օրինակ անգամ Չեխիան: Դասը շատ պարզ է, դուք էլ կարող եք հասնել դրան»,- ասաց պարոն Սվիտալսկին:
Նա նաեւ իր տարակուսանքը հայտնեց այն առումով, որ ընդդիմության զայրացած անդամները «մեզ են մեղադրում» Հայաստանում կոռուպցիայի համար. «Մենք ուզում ենք կոռուպցիայի դեմ պայքարել`կառավարության հետ, բայց Հայաստանին ազգային միասնություն է պետք կոռուպցիայի դեմ պայքարի հարցում, այնպես ինչպես ԼՂՀ եւ Ցեղասպանության հարցերում»:
Նա հիշեց, որ մի քանի օր առաջ, կրթության ոլորտին վերաբերող համանման միջոցառման ժամանակ ինքն Ուկրաինայի օրինակն էր բերել. «Արդար չէ Հայաստանն Ուկրաինայի հետ համեմատել, այնտեղ իրավիճակն ավելի վատ է: Բայց այդ զեկույցից կարող ենք Ուկրաինա բառը ջնջել, գրել Հայաստան»:
Այս անգամ էլ նա բերեց Լեհաստանի օրինակը. «Երբ Տիմոշեվիչը սկսեց «մաքուր ձեռքեր» շարժումը, նա շատ նախարարների հետ, անգամ իր մտերիմ ընկերների հետ թշնամացավ, բայց արեց այդ գործը»:
Կարդացեք նաև
Դեսպանը երկար խոսեց ՀՀ արդարադատության համակարգում առկա կոռուպցիայի, այն մասին, որ դատավորները մեկնաբանում են օրենքները սեփական հայեցողությամբ, օրենքի գերակայություն չկա, մարդիկ շատ դժգոհ են արդարադատության համակարգից ու դա շատ վատ է անդրադառնում մարդկանց կյանքի վրա:
Անդրադառնալով արդեն նախարար Արփինե Հովհաննիսյանի արած հայտարարություններին էլ ասաց, որ կարծում է, պետք է քրեական պատիժ սահմանել եկամուտների մասին սխալ հայտարարագիր ներկայացնելու համար, երբ կաշառքի դեպք է հայտնաբերվում, այդ գումարը գանձել պետբյուջե: «Կոռուպցիայի դատապարտումը եւ հետագա պատժումը կարեւոր է խուսափելու համար դատավորների եւ դատախազների հետագա օպորտունիզմից: Յուրաքանչյուր դեպք պետք է գրանցվի եւ կանգնի դատական ատյանի առջեւ»,- ասաց նա`հավելելով, որ ոչ մի իմունիտետ չպիտի լինի. «Շատ երկրներում դատավորներն անգամ զրկվում են թոշակ ստանալու իրավունքից, եթե հայտնաբերվում է կոռուպցիոն դեպք: Ես հասկանում եմ, որ դա շատ դաժան է, բայց պետք է կիրառել»:
Հակադարձելով Արփինե Հովհաննիսյանին`դեսպանը նաեւ նկատեց. «Հայաստանը հոյակապ փաստաթուղթ ունի, սա ամենալավ փաստաթուղթն է, որը ես երբեւէ բռնել եմ իմ ձեռքերում: Պրոբլեմը հետեւյալն է` պետք է այդ փաստաթղթի որակն ապացուցել գործողություններով»:
Այս համատեքստում, դեսպանը մատնանշեց երիտասարդների, որոնց հետ հանդիպման ժամանակ քննարկվել է Հայաստանի հակակոռուպցիոն ռազմավարությունը. «Նրանք ծիծաղում էին, հռհռում`ասելով, որ այդ փաստաթղթի որակը պետք է ապացուցել գործողություններով: Տիկին նախարարի ներկայությունը հուսադրող է, քաղաքական կամքի առկայությունը կարեւոր է: Դուք պետք է անեք դա, ձեր ապագային է վերաբերվում, ձեր երիտասարդները պիտի անեն, իրենց ապագայի մասին է խոսքը: Խնդրում եմ`արեք»:
ՀՀ արդարադատության նախարարի տեղակալ Սուրեն Քրմոյանը դեսպանի դիտարկումների առիթով ասաց. «Երիտասարդները թերահավատ էին ռազմավարության հետ կապված, բայց առանցքը կայանում է նրանում, որ կառավարությունը մենակ չի կարող, հասարակությունը պիտի աջակցի` կաշառք չտալով, ըմբոստանալով, քաղաքացիական կեցվածք դրսեւորելով: Հաճախ քննադատում են, որ կոռուպցիայի դեմ պայքարը դանդաղ է գնում, խնդիրներ են առաջանում, բայց մենք եռակողմ ձեւաչափով փորձում ենք համախմբել մեր ջանքերը`ՀՀ կառավարություն, միջազգային գործընկերներ, հասարակություն: Այս ռազմավարությունը ուղղված է լինելու հանրային ծառայության ոլորտում կոռուպցիայի նվազեցմանը: Առանց հանրային հավատի, վստահության, ռազմավարությունը հնարավոր չի լինելու կյանքի կոչել»:
Իր խոսքում փոխնախարարը շեշտադրում արեց նաեւ թափանցիկ կառավարման համակարգի ձեւավորման վրա:
Նելլի ԳՐԻԳՈՐՅԱՆ
