Հյուսթոնում ընթացող ծանրամարտի աշխարհի առաջնությունում ամենադրամատիկ հանգուցալուծումն ստացավ տղամարդկանց 77 կգ քաշայինների պայքարը:
Հայաստանն այս քաշային կարգում ներկայացնում էին մեդալների հավակնող մեր երկու ծանրորդները՝ Տիգրան Մարտիրոսյանը եւ Անդրանիկ Կարապետյանը, որոնց գլխավոր մրցակիցը օլիմպիական խաղերի հաղթող եւ աշխարհի կրկնակի չեմպիոն, չինացի Լյու Քսյույունն էր: Սակայն պայքարի ընթացքը այնպիսի սենսացիոն սրբագրումներ կատարեց, որոնց, վստահորեն կարելի է ասել, ոչ ոք չէր սպասում: Մեդալի հավակնորդներից առաջին տհաճ անակնկալը մատուցեց Տիգրանը: Պոկում վարժությունում նա երեք անարդյունբավետ մոտեցում կատարեց 163 կգ կշռող ծանրաձողին, որից հետո հրաժարվեց մասնակցել հրում վարժությանը:
Իր եւ տիտղոսակիր թիմակցի փոխարեն ստիպված էր միայնակ պայքարել 19-ամյա Անդրանիկ Կարապետյանը, որը, նախապես ասենք, լիովին արդարացրեց հույսերը: Առաջին մրցաձեւում սկսելով 164 կգ-ից, այնուհետեւ երրորդ մոտեցմամբ նա գլխավերեւում պահեց 167 կգ ծանրաձողը, ինչը նրան բերեց փոքր բրոնզե մեդալ:
Կարդացեք նաև
Հրում վարժությունում մրցակիցներին ուրախացրեց, իսկ իր երկպագուներին հիասթափեցրեց նաեւ ոսկե մեդալի գլխավոր թեկնածուն՝ Լյու Քսյույուն, որը երեք անգամ չկարողացավ իրեն ենթարկել 201 կիլոգրամը ու նույնպես դուրս մնաց երկամարտի պայքարից: Դրա փոխարեն Անդրանիկ Կարապետյանը ի վերջո այս վարժությունում ցույց տվեց 196 կգ եւ երկամարտի 363 կիլոգրամով ճանաչվեց 4-րդը: Դա շատ լուրջ հաջողություն է երիտասարդ ծանրորդի համար: Ընդորում, Անդրանիկը միայն անձնական քաշի պատճառով մեծ բրոնզե մեդալը զիջեց եգիպտացի Յուսուֆ Մոհամադին:
Աշոտ ՀԱԿՈԲՅԱՆ
