Հայաստանի բնակչության 47 տոկոսը չի վստահում սահմանադրական փոփոխությունների գործընթացին: Նրանց 39.5 տոկոսը կարծում է, որ փոփոխության անհրաժեշտություն չկա: Հարցումն իրականացվել է 1300 անձանց շրջանում` ամբողջ Հայաստանի տարածքով «APR Group» ՀԿ-ի կողմից:
«Մեդիա կենտրոնում» «APR Group» ՀԿ-ի սոցիոլոգ Լիանա Բալյանը ծանոթացրեց հարցման մյուս արդյունքներին: Մասնավորապես, հարցվածների 42.9 տոկոսը կարծում է, որ Հայաստանը սխալ ուղիով է զարգանում: 73 տոկոսի կարծիքով` աստիճանաբար իրավիճակը երկրում վատանում է: Հարցին`ինչպե՞ս կարելի է փոխել այս իրավիճակը, հարցվածների 39.8 տոկոսը պատասխանել է իշխանափոխությամբ, 13.9 տոկոսը դա կապում է կառավարման համակարգի փոփոխության հետ և միայն 11.8 տոկոսը սահմանադրության և օրենքների փոփոխության հետ:
Ըստ հարցման արդյունքների` 2015-ին սահմանադրական փոփոխությունների վերաբերյալ հանրային իրազեկության մակարդակը բարձր է 2014-ի համեմատ. հանրության 83.3 տոկոսը տեղյակ է, որ փոփոխություններ են տեղի ունենալու:
«APR Group» ՀԿ-ի նախագահ Ռուբեն Սարգսյանը ներկայացրեց տվյալներ այն մասին, թե որքանով են քաղաքացիները վստահում ընտրական գործընթացներին: 5.9 տոկոսը «լիովին վստահում է», «բոլորովին չի վստահում» 54 տոկոսը: Հարցվածների 80 տոկոսը տեղյակ է, որ հանրաքվե է անցկացվելու, մինչդեռ հանրաքվեից 2 շաբաթ առաջ հանրության 20 տոկոսը տեղյակ չէ այդ մասին:
Կարդացեք նաև
Հարցին ո՞րն է այս իրավիճակի պատճառը, «APR Group» ՀԿ-ի փորձագետ Հերիքնազ Տիգրանյանը պատասխանեց. «Պատճառներից է մարդկանց անտարբերությունը, գործընթացի շտապողականությունը: Երբ գործընթացը, գաղափարը դեռ լավ չի մարսվում հանրության կողմից, բնականաբար այստեղ լինում է օտարում գործընթացից: Ինքը չի սկսում խորանալ և չունի մոտիվացիա դրա հետաքրքրվածության համար»:
Հարցին, եթե այս կիրակի տեղի ունենար սահմանադրական հանրաքվե, ապա կմասնակցեի՞ք, «այո» է պատասխանել 64.4 տոկոսը, «ոչ» 31.3 տոկոսը: 51.4 տոկոսը չի վստահում ընտրական գործընթացներին, դրա համար էլ չէր մասնակցի հանրաքվեին, 22.6 տոկոսի համար միևնույն է և 2.7 տոկոսը դեմ է առաջարկվող նախագծին: Հանրաքվեի մասնակցության մասին «այո» պատասխանը տվողների 35.8 տոկոսը «այո» է քվեարկելու, 31.8 տոկոսը` «ոչ», 0.6 տոկոսը անվավեր է դարձնելու քվեաթերթիկը: Հարցվածների 71 տոկոսը կարծում է, որ կանցնի այս նախագիծը: Այս ցուցանիշը Ռուբեն Սարգսյանը մեկնաբանեց. «Այս մարդիկ համարում են, որ իրենց քվեն, ձայնը որոշիչ չեն, սա անճարության, անելանելիության արտահայտում է, անվստահություն գործընթացին»:
Տաթև ՀԱՐՈՒԹՅՈՒՆՅԱՆ
Լուսանկարը` «Մեդիա կենտրոն»-ի
