Բյուրեղավանի գիշերօթիկ դպրոցի նախկին տնօրեն Գայանե Մարգարյանի կալանավորման լուրը ամենաքննարկվողներից է: ՀՀ քննչական կոմիտեն ավարտել է այս գործով նախաքննությունը եւ մեղադրանք առաջադրել Գայանե Մարգարյանին՝ սաների նկատմամբ բռնություն գործադրելու, ֆինանսական չարաշահումներ իրականացնելու համար:
Կրթության փորձագետ Անահիտ Բախշյանն այս առումով մտահոգված է: Ասում է՝ վատ նախադեպ կա աչքի առաջ՝ Երեւանի թիվ 27 դպրոցի տնօրենի օրինակը. «Ինչ վերաբերում է Բյուրեղավանի գիշերօթիկ դպրոցի տնօրենին, խոսքը առանձնապես խոշոր չափերի յուրացումների մասին է, ինչի համար, այո,՛ պետք է կալանավորեին, բայց ոչ մի երաշխիք չկա, գուցե ամեն ինչ խաղաղվի, մարման ժամկետը անցնի ու այդ կինը նորից կգնա դպրոցի տնօրեն կնստի, մանավանդ որ նրա հովանավորը՝ աշխատանքի եւ սոցիալական հարցերի նախարարի տեղակալ Ֆիլարետ Բերիկյանը, իր տեղում նստած է»:
Կրթության փորձագետը շեշտում է. «Ցավոք, բոլորս գիտենք, թե մեր երկրում որքա՜ն խտրական են օրենքներն ու պատիժները կիրառվում եւ կախված նրանից, թե հովանաբար ունես, թե ոչ, համապատասխանաբար պատիժը լինում է չափազանց խիստ կամ չափազանց մեղմ: Ու պատիժը կրելուց հետո հանգիստ կարող ես գնալ եւ նորից նստել քո տեղում»:
Հիշեցնենք, որ այդպես պատահեց նաեւ թիվ 27 դպրոցի նախկին տնօրեն Սուսաննա Սարգսյանի պարագայում: Այս տարվա օգոստոսի 26-ին նա կրկին դպրոցի տնօրեն ընտրվեց, թեեւ դատապարտվել էր պետությանը խոշոր չափերի գույքային վնաս պատճառելու համար:
Կարդացեք նաև
Գոհար ՀԱԿՈԲՅԱՆ
Լուսանկարը՝ hetq.am-ի
