Այսօր ԱԺ արտահերթ նիստում քննարկված բոլոր նախագծերը դրվեցին քվեարկության եւ բոլոր նախագծերն էլ ընդունվեցին:
Քվեարկության դրվեց ՀՀ նախագահի ներկայացրած ԵՏՄ մաքսային տարածքում ապրանքների ներմուծման ու շրջանառության հարցերի մասին արձանագրությունը վավերացնելու հարցը: Այս նախագծի քննարկման ժամանակ, հիշեցնենք, որ ԵՏՄ-ից դժգոհություն էր ներկայացրել ՀՀԿ պատգամավոր Ալեքսան Պետրոսյանը:
Համաձայնագիրն ընդունվեց, քանի որ կողմ էր 98, դեմ՝ ընդամենը 6 պատգամավոր:
«ՀՀ-ի եւ Միջազգային զարգացման ՕՊԵԿ հիմնադրամի միջեւ կնքված ենթակառուցվածքների եւ գյուղական ֆինանսավորման աջակցության ծրագիր» վարկային համաձայնագիրը վավերացնելուն կողմ քվեարկեց 79, դեմ՝17 եւ ձեռնպահ՝ 5 պատգամավոր:
Կարդացեք նաև
Պետական պաշտոններ զբաղեցնող անձանց վարձատրության մասին օրենքի նախագիծը, որով նախատեսվում է բարձրացնել դատախազության աշխատակիցների աշխատավարձը, նույնպես ամբողջությամբ ընդունվեց՝ կողմ 68, ձեռնպահ 13, դեմ 19 ձայների հարաբերակցությամբ:
ՀՀ դատական օրենսգրքում փոփոխություններ կատարելու մասին նախագիծը, որով առաջարկվում էր դատավորների քանակը ավելացնել՝ ծանրաբեռնվածության պատճառով, ամբողջությամբ ընդունվեց 82 կողմ, դեմ 5 ձեռնպահ 16 քվեարկության արդյունքներով:
Համայնքների խոշորացմանն ուղղված վարչատարածքային բաժանման մասին օրենքում փոփոխությունների նախագծի քվեարկությունից առաջ ՀԱԿ խմբակցության ղեկավար Լեւոն Զուրաբյանը հայտարարեց, որ այդպես էլ Սահմանադրությունը խախտելով՝ համայնքների խոշորացման հանրաքվեի արդյունքները չկցվեցին նախագծին. «Փաստորեն, սա հակասահմանադրական քվեարկություն է եւ հակասահմանադրական նախագիծ: Խնդրում ենք մեր գործընկերներին քվեարկել դեմ եւ չդառնալ մասնակից այս հակասահմանադրական գործունեությանը»:
Գալուստ Սահակյանը պատասխանեց, որ տեղեկանքները բաժանվել են խմբակցություններին. «Չընդունեցինք ձեր ասածը, բայց արձանագրեցինք»:
Քվեարկության արդյունքներով պարզվեց, որ Լեւոն Զուրաբյանի հորդորը լսել էր 16 պատգամավոր, որոնք դեմ քվեարկեցին: ԲՀԿ խմբակցությունը երկմտանքի մեջ էր եւ վերջնական տեսակետ չէր հայտնել: Քվեարկությամբ ձեռնպահ քվեարկեցին, 68 կողմ-ով որոշումն ընդունվեց:
Վիճծառայության եռամյա աշխատանքային ծրագիրը հաստատվեց. կողմ էր 62 պատգամավոր, դեմ՝ 24, ձեռնպահ՝ 11 պատգամավոր:
Հռիփսիմե ՋԵԲԵՋՅԱՆ
