«Բոյկոտը ծայրահեղ տարբերակ է: Իհարկե, շատ դժվար է և գրեթե անհնարինության աստիճանի է ներկայիս ԵԽԽՎ-ում սահմանված խաղի կանոն փոխելը, բայց մենք պետք է փորձենք անել անգամ անհնարը այդ խաղի կանոնները փոխելու համար»,- խորհրդարանում, լրագրողների հետ զրույցում ասաց ԵԽԽՎ հայկական պատվիրակության անդամ Նաիրա Զոհրաբյանը` անդրադառնալով երեկ Փարիզում կայացած ԵԽԽՎ սոցիալական հանձնաժողովի նիստին, որը հավանության արժանացրեց Սարսանգի ջրամբարի զեկույցի ներառումը ԵԽԽՎ հունվարյան նստաշրջանի օրակարգ: Լրագրողներին հետաքրքրում էր` հնարավո՞ր է հայկական պատվիրակությունը բոյկոտի ԵԽԽՎ-ի աշխատանքները:
Տիկին Զոհրաբյանը կողմ է ԵԽԽՎ աշխատանքներում տարբեր գործիքակազմերի կիրառմանը, բայց ոչ ինքնանպատակ. «Պիտի հասկանանք դրա արդյունավետությունն ու դրա հետևանքները»:
Նա հիշեցնում է` Եվրոպայի խորհուրդը 47 անդամ երկիր ունի և Հայաստանը նույնքան ԵԽ-ում տեր է, որքան մնացած 46 երկրները. «Պետք է օգտագործենք բոլոր հնարավոր գործիքները և եթե չստացվի, ապա նոր իմաստ կունենա քննարկել այլ գործիքներ, այդ թվում և բոյկոտը»:
Նելլի ԳՐԻԳՈՐՅԱՆ
