ԱԺ ՀԱԿ խմբակցության քարտուղար Արամ Մանուկյանի հետ «ՉԻ»-ն զրուցեց սահմանադրական փոփոխությունների գործընթացի մասին։
– Պարոն Մանուկյան, սահմանադրական փոփոխությունների հանրաքվեի քարոզարշավի շրջանակներում շատ եք այցելում մարզեր, ի՞նչ տպավորություն անեք այդ այցերից։
– Արդեն 20 օր է՝ այցելում եմ գյուղեր, արդեն 45 համայնքում հանդիպումներ եմ ունեցել։ Մի բան է, որ ժողովրդի թշվառության, աղքատության մասին լսում ես, մեկ այլ բան, երբ այդ ամենը տեսնում ես։ Այն, ինչ տեսել եմ վերջին օրերին, աներեւակայելի է։ Իսկապես ծանր է վիճակը։ Արմավիրի գյուղերում տղամարդիկ ուղղակի լաց էին լինում, որ իրենց բերքը փչացել է։ Այդ մարդիկ խնդրում էին, որ գնամ տեսնեմ, թե իրենց հեկտարով այգիներն ինչպե՞ս են փչացել։ Մարդիկ խաղողը չեն քաղել, որովհետեւ հանձնելու տեղ չկա, խաղողը ընդունող չկա։ Արդյունքում այդ մարդկանց գումարները պարզապես կորել են։ Մարդիկ վարկ են վերցրել, որ խաղող աճեցնեն, բերքն իրացնեն ու որոշակի գումար աշխատեն, բայց հիմա այդ խաղողը ընդունող չկա, փոխարենը կան բանկային պարտավորություններ՝ բարձր տոկոսով վարկեր։ Իշխանությունները մարդկանց մղել են անկյուն, թողել՝ պարտքերի մեջ ու անհուսության մեջ թաղված։
Եվ այդ մարդիկ հեղափոխական են, նրանք դեմ են իշխանություններին, ուզում են կտրուկ փոփոխություններ։ Բայց այդ նույն մարդիկ ուրիշների կողմից այնքան են խաբվել, որ որեւէ մեկին չեն հավատում։ Իմ հանդիպումների ժամանակ կոնկրետ անուններ էին տալիս, որ այդ մարդիկ եղել են հրապարակում, բայց հետո լքեցին, հերոս էին՝ դավաճանեցին։ Մենք փորձում ենք հույս տալ, հավատ տալ, պայքարի մղել, բայց մի քիչ դժվար է։ Ընդամենը վեց ամիս առաջ նրանք այլ սպասումներ ունեին, փետրվարից հետո այլ վիճակ ստեղծվեց։ Ուստի՝ մեր հիմնական խնդիրը մարդկանց մեջ հույսը վերականգնելն է, մարդկանց մեջ պայքարի ոգին բարձրացնելն է, որ այդ մարդիկ գան ու «Ոչ» ասեն այդ հանրաքվեին՝ այդպես վրեժ լուծելով իշխանություններից։
Կարդացեք նաև
– Եվ ստացվո՞ւմ է մարդկանց մեջ հույս ա հավատ առաջացնել։
– Հասարակությունը մեզ չհավատալու հիմք չունի։ Այսօր հարթակին են 2003, 2008 եւ 2013թ. ընտրված նախագահները՝ Ստեփան Դեմիրճյան, Լեւոն Տեր-Պետրոսյան, Րաֆֆի Հովհաննիսյան։ Այդ երեք մարդիկ այսօր միասին դուրս են եկել հրապարակ, միասին շարունակում են պայքարել, եւ մարդիկ պետք է վստահեն նրանց։ Ուրիշ ո՞ւմ հավատան։ Պետք է հավատան, վստահեն ու գան՝ «Ոչ» քվեարկելու:
Արման ԳԱԼՈՅԱՆ
Հոդվածն ամբողջությամբ կարող եք կարդալ «Չորրորդ իշխանություն» թերթի այսօրվա համարում
