Ինչպես արդեն տեղեկացրել ենք, «Կարմիր քարտ» քաղաքացիական նախաձեռնությունը նոյեմբերի 23-ին բողոքի ակցիա էր կազմակերպել, որի ընթացքում պետք է նամակներ փոխանցեր ՀՀ կառավարությանը, Ազգային ժողովին եւ նախագահական նստավայր: Նախաձեռնությունը պահանջում է նվազեցնել էլեկտրաէներգիայի, շաքարավազի, գազի, ալյուրի եւ բենզինի սակագները:
Նախաձեռնության անդամները կառավարության շենքից շարժվեցին դեպի Բաղրամյան պողոտա: Բաղրամյան-Մոսկովյան խաչմերուկում նրանք ոստիկանությանը հայտարարեցին, թե փողոցով են ցանկանում շարունակել ակցիան, սակայն ոստիկանությունը հայտարարեց, որ թույլ չի տալիս, ոստիկանների թիվը ավելացավ:
Կարդացեք նաև
Նախաձեռնության անդամները ցանկացան անցնել մայթը, սակայն ոստիկանները պատ էին կազմել, սկզբից թույլ չէին տալիս նրանց անցնել, հրմշտոց սկսվեց, նախաձեռնության անդամները կարողացան անցնել մյուս մայթ, սակայն, անցնելով մայթը վերադարձան եւ շարունակեցին իրենց երթը մայթով:
Նրանք ոստիկանությանը ժամանակ տվեցին մինչեւ Բաղրամյան 26 հասնելը ներկայացնել իրավական հիմքեր, թե ինչու չեն թողնում մայթն անցնել:
«Կարմիր քարտ» նախաձեռնությունը Ազգային ժողով հասավ 18:00-ից հետո, երբ աշխատանքային ժամն արդեն ավարտված էր, սակայն նախաձեռնության անդամները պնդում էին, որ իրենք պետք է իրենց նամակը փոխանցեն ԱԺ եւ կսպասեն մինչեւ աշխատանքային ժամի սկսվելը: Հայտարարությունից որոշ ժամանակ անց նրանց մոտեցավ Ազգային ժողովի աշխատակիցը: Նա ասաց, որ վաղն առավոտյան նամակը կփոխանցվի ԱԺ նախագահ Գալուստ Սահակյանին:
Ամի ՉԻՉԱԿՅԱՆ
