ԱԺ-ում կառավարության հրավիրած արտահերթ նիստում քննարկվեց Պետական պաշտոններ զբաղեցրած անձանց վարձատրության մասին օրենքում փոփոխություններ կատարելու մասին օրինագիծը երկրորդ ընթերցմամբ ընդունելու մասին հարցը: Հիշեցնենք, որ այդ հարցը վերաբերում էր դատախազության աշխատողների աշխատավարձը բարձրացնելուն: Հիմնական զեկուցողը արդարադատության նախարարի առաջին տեղակալ Արսեն Մկրտչյանն էր, որը դահլիճում չէր:
Գալուստ Սահակյանը աջուձախ էր նայում, փնտրում Արսեն Մկրտչյանին. «Դահլիճում չի՞:Չե՞ք կարողանում գտնել՝ գալու է, չի գալու, որտե՞ղ եք: Սա էլ է հարգանքի պրոցես, ո՞նց կարելի է զեկուցող լինել ու ուշանալ՝ պատգամավորները նստեն ու սպասեն»:
Գալուստ Սահակյանը բարկացել եւ հոնքերը հավաքել էր: Արսեն Մկրտչյանը ներողություն խնդրեց. «Ներողություն, մեծարգո նախագահ, վաղուց էի ներկա ԱԺ-ում»:
Չիմանալով, թե օրակարգի որ հարցն է հայտարարել Գալուստ Սահակյանը եւ որ նախագիծը պետք է զեկուցի, Արսեն Մկրտչյանը սկսեց ներկայացնել Դատական օրենսգրքում փոփոխությունների նախագիծը, որով առաջարկվում էր 2-ով ավելացնել դատավորների թիվը դատարաններում՝ հաշվի առնելով նրանց ծանրաբեռնվածությունը:
Կարդացեք նաև
Ուշագրավ է, որ ոչ ԱԺ նախագահը, ոչ դահլիճում որեւէ պատգամավոր չնկատեց տարբերությունը այդ երկու օրինագծերի եւ փոխնախարարին չընդհատեցին:
ՕԵԿ պատգամավոր Հովհաննես Մարգարյանն առաջարկել է նախատեսված թվից դատավորների թիվը մեկով կրճատել, որպեսզի փուլային անցում կատարվի. «Գուցե գործերի քանակը նվազի, էլ կարիքը չլինի, կամ այնքան ավելանան, որ 3-ական ավելացնեն թիվը»:
Կառավարությունն այս առաջարկը մերժեց՝ ասելով, որ դա անհրաժեշտ նվազագույնն է եւ պետք է ավելացնեն հենց 2-ով:
Հովհաննես Մարգարյանն էլ ասաց, որ իրենք կողմ չեն քվեարկի, քանի որ կառավարութունն ասում է՝ բյուջեում փող չկա, տնտեսական, սոցիալական խնդիրներ կան ու 2-ով ավելացնում է դատավորների թիվը:
Հռիփսիմե ՋԵԲԵՋՅԱՆ
