«Սխալվելը բոլոր դեպքերում բացառված չէ: Այդ պարագայում կրկնակի բուժզննում է տարվում, եթե անհրաժեշտ է՝ բուժում են, եթե պիտանի չէ՝ զորացրում են»,- այսօր խորհրդարանում լրագրողների հետ զրույցում ասաց ՀՀ Զինված ուժերի գլխավոր շտաբի պետի տեղակալ Մովսես Հակոբյանն՝ անդրադառնալով ծառայության համար ոչ պիտանի երիտասարդներին զորակոչելու դեպքերին:
Նա խնդիր չի համարում, որ երբեմն բանակ են զորակոչվում հիվանդ երիտասարդներ: «Փառք աստծո, այդ պարագայում մահացության դեպքեր չունենք»,-ասաց նա՝ հավելելով, որ բուժսպասարկման տեսանկյունից ամենից վերահսկելին բանակն է:
Անդրադառնալով ծառայության ընթացքում հիվանդությունների ձեռք բերման դեպքերին էլ, Մովսես Հակոբյանը հավաստիացրեց, որ նրանց բուժօգնությունը պատշաճ իրականացվում է: Նա միանշանակ հայտարարեց, որ բուժսպասարկման վիճակը բանակում բարձր մակարդակի վրա է. «Որևէ մի տեղ նման բուժապահովում չկա, ինչպես բանակում: Մի հատ 10 – 15 տարվա հետ համեմատեք, տեսեք, որ նվազել է: Այնպիսի վիճակ է, որ հիվանդությունների պատճառով կորուստներ չունենք: Բայց եթե զինվորը հիվանդանում է, բուժում ենք, նոր զորացրում բանակից»:
Նելլի ԳՐԻԳՈՐՅԱՆ
