«Երևան» մշակութային կենտրոնի համանուն համերգասրահում այսօր ցուցադրվեց դերասանուհի, պարուհի, ռեժիսոր-բալետմայստեր Աիդա Սիմոնի «Խորհրդավոր ընթրիք» պարային ներկայացումը, որն առաջին անգամ բեմադրվել է 2013թ.՝ Համազգային թատրոնում: Հատկանշական է, որ 6 պարուհիներն էլ աղջիկներ են: Ռեժիսորը սա բացատրում է պարուհիների նուրբ եւ պլաստիկ շարժումներով, որոնք որոշ տեսարաններում տղաները չեն կարող իրականացնել:
«Հայաստանում նախադեպը չունեցող ներկայացումը բեմադրված է ըստ Լեոնարդո դա Վինչիի համանուն ստեղծագործության: Ուղեկցվում է Բախի երաժշտությամբ, թեեւ տեսակով եւ ոճով ժամանակակից է: Ներկայացումն առանձնանում է պարային ազատ ոճով, որը Հայաստանում չի կիրառվում. շարժումները համահունչ են երաժշտությանը: Ներկայացման մեջ խոսք չկա, յուրաքանչյուրը կարող է այն հասկանալ: Էսթետիկ առումով սա ստացված ներկայացում է»,-Aravot.am-ի հետ զրույցում ասաց Աիդա Սիմոնը:
Նրա խոսքով՝ հանդիսատեսը եւ թատերագետները ներկայացումը յուրովի են ընկալում, քանի որ այն մտորելու տեղիք է տալիս. «Հաճելի է, երբ ներկայացումը քննարկում են, եւ տարբեր կարծիքներ ես լսում: Մարդիկ բարձրաձայնում են հարցեր, որոնք առօրյայում գուցե չհիշատակվեին»:
Կարդացեք նաև
Աիդա Սիմոնը նաեւ տեղեկացրեց, որ պատրաստվում է բեմադրել Հիերոնիմոս Բոսխի «Հաճույքի պարտեզ» ստեղծագործության համանուն ներկայացումը, որն ուղեկցվում է 20-րդ դարի դասական երաժշտության գլուխգործոցներով:
«Երեւան» մշակութային կենտրոնի մասին մանրամասն՝ այստեղ:
Լուիզա ՍՈՒՔԻԱՍՅԱՆ
