«Սահմանադրական փոփոխությունների հետ կապված՝ կարող եմ կարծիքս հայտնել արդեն նոր ձեռք բերած գիտելիքների տեսանկյունից. փոփոխությունների նպատակահարմարության հարցը քննարկել այն դեպքում, երբ գործընթացը սկսվել է, առնվազն արդյունավետ չէ: Ցավոք, ես հնարավորություն չեմ ունեցել ծանոթանալ մանրամասներին, բայց որոշ դիտարկումներով կարող եմ կիսվել»,- 168.am-ի հետ զրույցում անդրադառնալով սահմանադրական փոփոխություններին՝ ասել է ՀՀ նախկին փոխվարչապետ, տարածքային կառավարման նախկին նախարար Արմեն Գևորգյանը, ով մեկ տարի առաջ հրաժարական ներկայացրեց և այժմ General management է ուսանում Հարվարդի համալսարանում:
«Առաջին հերթին՝ Հայաստանում օրակարգը շարունակում է ձևավորել գործող իշխանությունը, որն արդյունքում ավելի նախաձեռնող է, քան ընդդիմությունը: Նկատի ունեմ հենց սահմանադրական բարեփոխումների անցկացման գաղափարը: Երկրորդը՝ պետք է հասկանալ՝ ի՞նչ է մեզ սպասվում այդ փոփոխություններից հետո: Դա միայն ենթադրում է պետական մարմինների և իշխանության ինստիտուտների կարգավիճակի մեխանիկական փոփոխությո՞ւն, թե՞ պետք է առաջնորդվենք մեր երկրի հասարակական զարգացման առավել գլոբալ նպատակներով:
Կլինի՞ այն լայն հասարակական կոնսենսուս և մեր երկրի առջև ծառացած հիմնական մարտահրավերների շուրջ մոբիլիզացիա, թե՞ մենք կխորացնենք հակադրությունը ու դրանով բաց կթողնենք ավելի արմատական և որակական բարեփոխումների անցկացման հնարավորությունը՝ բեկումնային զարգացման համար»,- ասել է Արմեն Գևորգյանը
Անդրադառնալով լուրերին, թե հնարավոր է՝ Ա. Գևորգյանը չվերադառնա Հայաստան, վերջինս ասել է՝ «Հայաստանից գնալու ոչ մի ծրագիր չունեմ: Վերադառնում եմ դեկտեմբերին»:
Կարդացեք նաև
Հոդվածն ամբողջությամբ՝ «168 ժամ» թերթի այսօրվա համարում
