«Կառավարման համակարգի փոփոխությունը՝ խորհրդարանական համակարգն, ըստ մեզ, լավագույնս կապահովի մարդու իրավունքների պաշտպանությունը Հայաստանի Հանրապետությունում, ժողովրդավարության հետագա զարգացումը կստեղծի կառավարման արդյունավետ համակարգ եւ, ի վերջո, իրավունքի գերակայություն ու անկախ դատական իշխանություն»,-այս մասին, անդրադառնալով Սահմանադրական բարեփոխումներին՝ այսօր «Հայելի» ակումբում ասաց ՀՀ Ազգային ժողովի ՀՀԿ խմբակցության անդամ Արտակ Դավթյանը:
Պարոն Դավթյանը կարծում է, որ վերոնշյալ նպատակներն իրականացնելու համար կառավարման խորհրդարանական համակարգը կստեղծի բոլոր անհրաժեշտ եւ բավարար նախադրյալները:
Իսկ «Ազգային համաձայնություն» կուսակցության նախագահ Արամ Հարությունյանը նշեց, որ իշխող կուսակցությունն, այդ թվում՝ նաեւ Հանրապետական կուսակցությունը երկրի հիմնական խնդիրները կապում են կառավարման համակարգի հետ. «Դա բնավ էլ այդպես չի: Կարճ, ամենակարճ տարբերակը մի քանի օր առաջ այն հայրիկը նախագահականի առջեւ հստակ տվեց ամեն ինչ: Ամենալավ «ոչ»-ն այս քարոզարշավի, տեսահոլովակը դրանից լավը չկա: Ինչքան, որ հավանել են այդ տեսահոլովակը, դա ամեն ինչ ասում է»:
Անդրադառնալով Սերժ Սարգսյանի այն հայտարարությանը, թե Սահմանադրությունը կփոխվի եւ դատարանները կգործեն, Արամ Հարությունյանն ասաց. «Իշխող կուսակցությունը փաստորեն ասում է, որ դատարաններն անկախ չեն: Համոզված եմ, որ հիմա դատավորները հաստատ ընդդիմությունից կախված չեն, իշխանություններից են կախված: Ըստ էության նախագահն ինքն իրեն հակասեց, որովհետեւ, եթե կախված են, ապա կախված են նախագահից կամ գործադիրից: Այդ դեպքում ի՞նչ է խանգարում, այսինքն նախագա՞հը չի ուզում, որ արդար որոշումներ ընդունվի: Այսինքն` իրենք իրենց հակասում են»:
Կարդացեք նաև
Արամ Հարությունյանը կարծիք հայտնեց, թե բոլորը հասկանում են, որ կառավարման համակարգը ոչ մի կապ չունի. «Ի՞նչ կապ ունի կառավարման համակարգը երկրի վիճակի հետ: Հակառակն՝ իշխանությունը լրիվ ձեր ձեռքում է, վերցրեք ինչ ուզում եք արեք: Ո՞վ է ձեզ խանգարում: Ո՞վ է խանգարում, որ տնտեսությունը զարգանա, ո՞վ է խանգարում, որ դատարանները լինեն նորմալ»:
Աշոտ ԻՍՐԱԵԼՅԱՆ
