Այսօր՝ նոյեմբերի 20-ին, ԱՄՆ Միջազգային զարգացման գործակալությունը և Սմիթսոնյան ինստիտուտն ազդարարեցին «Իմ Հայաստան» ծրագրի մեկնարկի մասին:
Ծրագրի նպատակն է զարգացնել և ընդլայնել մշակութային զբոսաշրջությունը Հայաստանի մարզերում:
«Ես շատ ուրախ ու ոգևորված եմ այսօր «Իմ Հայաստան» ծրագրով,- ասաց ՀՀ-ում ԱՄՆ դեսպան Ռիչարդ Միլսը.- անհավատալի մի հնարավորություն է սա Հայաստանի համար, որի հարուստ մշակութային ժառանգությունը, յուրօրինակ խոհանոցը, գեղատեսիլ բնությունն ու բարեհամբույր մարդիկ դարձնում են այն առանձնահատուկ վայր»:
Ծրագրի նպատակը, դեսպանի խոսքով, Հայաստանը համաշխարհային դասի զբոսաշրջային երկիր դարձնելն է. «Այսօր Հայաստանում տուրիստական շուկան նեղ է: Հայաստան ժամանող զբոսաշրջիկների մեծ մասը մնում է մայրաքաղաքում և մեկ օրով է միայն այցելում հարակից վայրեր: Այսինքն՝ տուրիզմից ստացվող եկամուտները կենտրոնացած են հիմնականում Երևանում, իսկ այս ծրագիրն իր առջև խնդիր է դնում, որ տնտեսական այդ եկամուտները տարածվեն նաև մայրաքաղաքից դուրս: Դրա համար անհրաժեշտ է Երևանից դուրս ձևավորել տուրիստական վայրեր, ինչը գրավիչ կլինի զբոսաշրջիկների համար, կդրդի նրանց այցելել նաև մարզեր և ավելի շատ գումար ծախսել գյուղական համայնքներում»,- ասաց Ռիչարդ Միլսը:
Կարդացեք նաև
«Դեսպանի խոսքն այնքան համոզիչ էր, որ եթե ես լինեի այլ երկրի քաղաքացի, անպայման ցանկություն կունենայի այցելելու Հայաստան»,- ասաց ՀՀ վարչապետ Հովիկ Աբրահամյանը:
Վարչապետն իր ելույթում նշեց, որ զարգացման տեմպերով ու արդյունքներով, զբոսաշրջությունը մեր երկրում առավել դինամիկ զարգացող ճյուղերից է. «2014 թ. Հայաստան է այցելել մոտ 1 մլն 204 հազար զբոսաշրջիկ, որը 11.3%-ով բարձր է 2013-ի ցուցանիշից»,- ասաց Հ. Աբրահամյանը:
Նա հույս հայտնեց, որ նոր մեկնարկած ծրագիրը կնպաստի աշխարհում Հայաստանի հոգևոր և մշակութային ժառանգության ներկայացմանն ու զբոսաշրջության զարգացմանը:
Հավելենք, որ վերապատրաստման դասընթացների, ծրագրերի մշակման, համայնքների ներգրավման, փաստագրման և այլ միջոցներով Սմիթսոնյանի կուրատորներն ու ծրագրի անձնակազմը կաշխատեն հայաստանյան գործընկերների հետ՝ մշակութային ժառանգությունը պահպանելու նպատակով նոր ռազմավարություններ մշակելու համար:
Չորս տարի տևողությամբ ծրագրի արժեքը հինգ միլիոն դոլար է:
Սիրանուշ ՀԱՅՐԱՊԵՏՅԱՆ
