Ինչպես տեղեկացրել ենք, ԱԻՄ առաջնորդ Պարույր Հայրիկյանը նամակ էր հանձնել ԿԸՀ քարտուղարությանը, որով հանձնաժողովին հորդորում է հրաժարվել «կոպտագույն խախտումներով ասպարեզ իջեցված սահմանադրության նախագծի վերաբերյալ հանրաքվե կազմակերպելու հանձնարարականից»:
Aravot.am-ը պարոն Հայրիկյանից հետաքրքրվեց` ի՞նչ պատասխան են ստացել: Նա հայտնեց. «ԿԸՀ-ն պիտի մերժեր, մենք դա գիտեինք սկզբից: Բայց ԿԸՀ յոթ անդամները ՀՀ քաղաքացիներ են, և երկու օր առաջ կայացած զրույցում մենք դիմում էինք քաղաքացիներին՝ չդառնալ հանցագործության մասնակից: Այս հանրաքվեն հակասահմանադրական միջոցառում է:
Իհարկե, վաղը մենք բոլորս կկանգնենք ու կասենք՝ ոչ: Բայց այս փուլում մենք մի գերխնդիր ունենք. քանի որ ակնհայտ է` սա հակասահմանադրական գործընթաց է, ապօրինի հանրաքվե, ուստի նոյեմբերի 27-ին հանրահավաք ենք անում, բոլոր դաշինքներին հրավիրում ենք՝ ասելով, որ սա ապօրինի հանրաքվե է, քանի դեռ չի քննարկվել այլընտրանքային նախագիծը: Այնինչ երրորդ նախագահը փախչում ու մտնում է կողքի սենյակ»:
Տաթև ՀԱՐՈՒԹՅՈՒՆՅԱՆ
