Եվրոպական միությունը կավելացնի «Արեւելյան գործընկերության» երկրների քաղաքացիական հասարակությանը տրվող ֆինանսավորման ծավալը: Եվրոպական հանձնաժողովի պաշտոնական կայքից տեղեկանում ենք, որ այս հայտարարությունն արել է ԵՄ ընդլայնման եւ հարեւանության հարցերով հանձնակատար Յոհաննես Հանը:
«Մենք արդեն որոշել ենք ավելացնել քաղաքացիական հասարակությանը տրվող ֆինանսավորման ծավալը (այժմ այն կազմում է 150 միլիոն եվրո, իսկ անցած ժամանակահատվածում՝ 90 միլիոն եվրո էր)»,- այսօր Կիեւում ընթացող «Արեւելյան գործընկերության» անդամ երկրների քաղաքացիական հասարակության ֆորումի ընթացքում ասել է Հանը:
Յոհաննես Հանը նաեւ շեշտել է, որ «Արեւելյան գործընկերության» երկրների ավելի քան 200 կազմակերպություններ, այդ թվում՝ Արևելյան գործընկերության Քաղաքացիական հասարակության ֆորումը եւ դրա Ազգային պլատֆորմները Մոլդովայում, Վրաստանում ու Հայաստանում, օգտվել են այդ ֆինանսավորումից. «Մենք ուսումնասիրում ենք Ուկրաինայի ազգային պլատֆորմին տրվող օգնության ծավալի ավելացման հնարավորությունը»:
Հիշեցնենք, որ «Արեւելյան գործընկերություն» ծրագրին մաս են կազմում Ուկրաինան, Բելառուսը, Մոլդովան, Վրաստանը, Հայաստանը եւ Ադրբեջանը:
Կարդացեք նաև
Պատրաստեց Աշոտ ԻՍՐԱԵԼՅԱՆԸ
