Դեկտեմբերի 6-ին՝ սահմանադրական փոփոխությունների հանրաքվեի օրը Շիրակի մարզի մի քանի համայնքներում՝ Շիրակում, Բասենում, Գառնառիճում, Գեղանիստում, Նահապետավանում, Վահրամաբերդում, Տուֆաշենում ու Պեմզաշենում համայնքապետի ընտրություններ են, իսկ Անուշավանում, Արեւիկում, Նահապետավանում՝ ավագանու ընտրություններ:
«Այո»-ի քարոզարշավին լծված գյուղապետերից մի քանիսի համար այդ օրը կրկնակի լարված է լինելու, քանի որ վերջիններս ձայներ են ապահովելու թե՛ իրենց համար, թե՛ «Այո»-ի:
Ինչպես մեզ տեղեկացրեց Շիրակի մարզպետարանի տարածքային վարչության տեղական ինքնակառավարման եւ համայնքային ծառայության հարցերի բաժնի պետ Ռուբեն Հարությունյանը, թեժ մրցակցություն կա Բասենում, Գեղանիստում, Նահապետավանում, Շիրակում:
Թվարկված գյուղերում հետաքրքիր մրցակցային պատկեր է ստացվել. մրցակցում են ՀՀԿ-ականներ ու անկուսակցականները, Հայաստանի մյուս կուսակցություններից ոչ մի թեկնածու չկա, մրցակցում են հիմնականում գործող գյուղապետերը ու գյուղի գործազուրկները:
Կարդացեք նաև
Օրինակ՝ Բասենում գործող գյուղապետի՝ ՀՀԿ-ական Համլետ Պետրոսյանի մրցակիցը անկուսակցական Սեւակ Սաֆարյանն է: Գեղանիստում 4 թեկնածուներ են. անկուսակցական գյուղապետ Աղասի Ղազարյանի դեմ դուրս են եկել ՀՀԿ-ական Զորիկ Ասլանյանն ու անկուսակցականներ Սեյրան Գալստյանն ու Արմեն Նիկողոսյանը: Նահապետավանում 3 թեկնածուներ են՝ գործող գյուղապետ ՀՀԿ-ական Գոռ Պետրոսյանն ու անկուսակցականներ Թորոս Թորոսյանն ու Լեռնիկ Հարությունյանը: Վերջինս, ի դեպ, գյուղի մշակույթի տան աշխատակից է: Շիրակում մրցակցում են գործող համայնքապետ, ՀՀԿ-ական Խորեն Հարությունյանը ու անկուսակցական Ժորա Քոչարյանը:
Մյուս գյուղերում գործող գյուղապետերի հետ իրենց թեկնածությունն են առաջադրել այսպես ասած դրածո թեկնածուներ, օրինակ՝ Ամասիայի գեղատեսիլ վայրերից մեկում՝ Գառնառիճում «մրցում են» գործող ՀՀԿ-ական գյուղապետ Վանիկ Մանուկյանն ու անկուսակցական Մանվել Ղազարյանը՝ գյուղի դպրոցի զինղեկը: Տուֆաշենում նույն պատկերն է, «մրցակցում են» գործող գյուղապետ՝ ՀՀԿ-ական Արտակ Եգորյանն ու անկուսակցական Նելսոն Մկրտչյանը, որը, ըստ մեզ հասած տեղեկությունների, նույնպես դրածո է: Վահրամաբերդում «մրցում են» գործող գյուղապետ, ՀՀԿ-ական Աղվան Մարտիրոսյանն ու անկուսակցական, գյուղապետարանի աշխատակից Սեդրակ Գեւորգյանը:
Պաշտոնը կորցնելու որեւէ վտանգ չի սպառնում նաեւ Արթիկի տարածաշրջանի Պեմզաշենի գյուղապետ, անկուսակցական, նույն տարածքի ԵԿՄ կառույցի պատասխանատու Անանիկ Ոսկանյանին՝ գեներալ Մանվել Գրիգորյանի սանիկին: Մեզ տեղեկացնում են, որ նրա հետ «մրցակցում է» անկուսակցական Արտեմ Վրեժի Խլղաթյանը, որը մեր աղբյուրների բնութագրելով, «նրա դրած տղաներից է»:
Նունե ԱՐԵՎՇԱՏՅԱՆ
