Ահաբեկչության մակարդակը 2014 թվականին ամբողջ աշխարհում աճել է 80%-ով ինչը երբեւիցե գրանցված ամենաբարձր ցուցանիշն է: Այս մասին, ըստ «Business Insider»-ի, ասվում է «Էկոնոմիկայի և խաղաղության ինստիտուտ»-ի «Ահաբեկչության համաշխարհային ինդեքս- 2015» զեկույցում:
Հեղինակներն ընդգծել են, որ 2014 թվականին բռնությունների աճի պատճառով 32.658 մարդ է մահացել, իսկ 2013-ին՝ 18.111: Ահաբեկչությունների աճի մեղավորներն են «Իսլամական պետություն» եւ «Բոկո Հարամ» խմբավորումները: Այս երկու խմբավորումները միասին պատասխանատու են 2014 թվականին իրականացված ահաբեկչությունների 51%-ի համար:
Նշված է, որ 2014 թվականին ահաբեկչությունների արդյունքում մահացությունների ամենամեծ թվերը գրանցվել են Աֆղանստանում, Իրաքում, Նիգերիայում, Պակիստանում եւ Սիրիայում: Այս երկրների է բաժին ընկել ընդհանուր զոհերի 78%-ը:
«Ահաբեկչության համաշխարհային ինդեքս-2015»-ում անդրադարձ է կատարվել նաեւ մեր տարածաշրջանին: Ըստ այդմ՝ Հայաստանը տարածաշրջանի ամենաանվտանգ երկիրն է եւ զբաղեցրել է 116-րդ հորիզոնականը:
Կարդացեք նաև
Հայաստանի հարեւաններ Ադրբեջանը, Վրաստանը, Իրանը եւ Թուրքիան զբաղեցրել են համապատասխանաբար 93-րդ, 71-րդ, 39-րդ եւ 27-րդ հորիզոնականները: Իսկ Ռուսաստանն այս տարի 23-րդ հորիզոնականում է:
Պատրաստեց Աշոտ ԻՍՐԱԵԼՅԱՆԸ
