Հանրապետական կուսակցության ներսում, մինչեւ Սահմանադրության հայեցակարգի նախագծի ընդունումը, անվտանգության հարցը շատ երկար քննարկման առարկա է դարձել: Այս մասին նոյեմբերի 19-ին Կովկաս ինստիտուտում կազմակերպված քննարկման ընթացքում հայտարարեց ԱԺ պատգամավոր Խոսրով Հարությունյանը:
«Հանրապետության նախագահը, լինելով գերագույն գլխավոր հրամանատար, նա ռեսուրսները տիրապետողը չէ, ռեսուրսները տիրապետում է կառավարությունը, որը ձեւավորվում է Ազգային ժողովում ձեւավորված քաղաքական մեծամասնությամբ: Պատկերացրեք՝ գերագույն գլխավոր հրամանատարը պետք է որոշումներ կայացնի, բայց ռեսուրսների կառավարման հարցը գտնվի, պատկերացրեք, տեսական հարց եմ տալիս, մեկ այլ քաղաքական ուժի տնօրինման տակ, որտեղ կա կոնֆլիկտ քաղաքական: Համաձայնեք, որ սա լավագույնը չէ: Լավագույնը չէ քաղաքական կայունության, անվտանգության ապահովման տեսանկյունից»,- ասաց նա:
ԱԺ պատգամավորը նշեց, որ առաջարկվող համակարգում գերագույն գլխավոր հրամանատարի գործառույթները վերապահված են գործադիր մարմնի ղեկավարին՝ վարչապետին, որը տնօրինում է ամբողջ ռեսուրսները: Նա էական է համարում, որ այն պաշտոնյան, որը ստանձնել է գերագույն գլխավոր հրամանատարի պատասխանատվությունը՝ բացարձակապես տիրապետի ռեսուրսներին. «Այսինքն՝ կոնֆլիկտ այստեղ, որպես այդպիսին, գոյություն չունի, ընդ որում՝ նույն արտաքին հարաբերությունների ամբողջ պրոբլեմատիկան, ամբողջ պատասխանատվությունը օրենսդրորեն սահմանադրորեն վերապահված է վարչապետին»:
Ամի ՉԻՉԱԿՅԱՆ
Կարդացեք նաև
