Սիրիայում արդեն 4 տարի է՝ ընթանում է քաղաքացիական պատերազմ: Սփյուռքի նախարարության տվյալներով` 2015թ. առաջին եռամսյակի դրությամբ ՀՀ-ում բնակվում է շուրջ 17 հազար սիրիահայ:
Հայաստանում ներգաղթած սիրիահայերի համար կան բազմաթիվ խնդիրներ, որոնք լուծվում են կամ լուծված են: Դրանք են՝ փաստաթղթերի օրինականացում, տարբեր վկայականների տրամադրում, անվճար վիզաների տրամադրում Սիրիայից ներգաղթած ոչ ՀՀ քաղաքացիների համար:
Սփյուռքի նախարարության աշխատակազմի ղեկավար Ֆիրդուս Զաքարյանի խոսքով՝ սրտի վիրահատությունը և այլ փոքրիկ բժշկական խնդիրների լուծումները սիրիահայերի համար իրականացվում են պետպատվերի սահմաններում: Կրթությունը ԲՈւՀ-երում հիմնականում անվճար է: Դեռ կան խնդիրներ բնակարանների ապահովման հարցում:
Սիրիահայերի մի մասը ՀՀ-ում նախընտրում է զբաղվել փոքր և միջին բիզնեսով, հիմնականում՝ բացել սեփական սննդի կետ:
Կարդացեք նաև
Այդպիսի ընտանիքներից մեկն է Ջաբակչուրյանների ընտանիքը: Նրանք նույնպես ներգաղթել են Հայաստան Սիրիայից:
Նալբանդյան 5: Այստեղ արդեն մի քանի տարի է, ինչ գործում է սրճարան, որը բացել են սիրիահայեր, հայր և որդի՝ Գրիգոր և Կայծակ Ջաբակչուրյանները: Լահմաջո «Կայծ» անվանվող սրճարանն այժմ աշխատեցնում է միայն Կայծակը:
– Արդեն երկար ժամանակ է այս գործի մեջ ենք: Պապաս ալ կաշխատեր, հիմա ես եմ աշխատում: Սիրիայում ես իմ պապայիս զատ կաշխատեի, պապաս էլ զատ կաշխատեր: Եվ էստեղ եկանք, շարունակեցինք նույն գործը, – պատմում է Կայծակը:
Կայծակը մեր այն հայրենադարձներից է, ովքեր որոշել են հիմնովին հաստատվել իրենց հայրենիքում:
-Ես չեմ հասկանում այն մարդկանց, ովքեր տեղափոխվում են Հայաստան, բայց հետո գնում են ուրիշ, երրորդ երկիր,- ասում է Կայծակը:
Նրա խոսքերից հասկանում ես, որ նա լցված է օպտիմիզմով և իր սրճարանը մտնելով, պատին տեսնում ես մի հայրենասիրական գրություն. «Երկիրը երկի՛ր է»:
Լիլիթ ԴԵՄՈւՐՅԱՆ
Կեցցե՛ս, Կայծակ:
Անունիդ արժանի հայորդի:
Քեզիպէսներն որ պատիւ կը բերեն Սուրիոյ Հայերուն:
Առաջին առիթով քովէդ կ’անցնիմ, ձեռքդ կը սեղմեմ:
Քեզ վստահեցնեմ որ Հայատանէն զատ ուրիշ տեղ գացող սուրիահայերուն 90%-ը՝ հայրենադարձներէն աւելի դժուար վիճակի մէջ կը գտնուին, թէ նիւթապէս, եւ թէ մանաւանդ, մանաւանդ հոգեպէս: (Կրնան չընդունիլ անշուշտ, գիտես ինչպէս է, ինչպէս ենք… Սակայն այդ է բացայայտ իրականութիւնը: )
Երանի մեր ժամանակ ալ, երբ որ Լիբանանի դժոխքէն ափալ-թափալ փախանք, անկախ Հայաստան, Արցախ ունենայինք:
Լաւ մնաս,
Մ. Հայդուկ Շամլեան, Գանատա
https://www.shoushisummercamp.org/